Iniciativas Parlamento Galego

Onte acudimos á xuntanza convocada polo Comité de Empresa do Hospital da Barbanza, para reivindicar a dotación de celadores no noso hospital. Ana Luisa Bouza, deputada do BNG e portavoz de sanidade no Parlamento Galego, acompañounos. Rosana Pérez, candidata pola Pobra, Anxela Franco, candidata polo Son, e o concelleiro de Ribeira, Xosé Luís Groveiro, así como o concelleiro de Boiro, Xan León e máis eu fomos as/os encargadas/os de tranmitirlle ao Comité de Empresa o apoio do BNG da Barbanza nesta xusta reivindicación. (máis…)

1.Que o Pleno do Concello inste á Xunta de Galiza a adoptar as medidas precisas para posibilitar a aplicación práctica da legalidade vixente a fin de acadar a consideración real da gasolina como combustíbel profesional e, deste xeito, posibilitar a rebaixa dos prezos da gasolina ás embarcacións pesqueiras profesionais que utilizan este combustible no noso Concello.

2.Que se solicite a posta en marcha dun programa de instalación de depósitos e surtidores de gasolina nos portos galegos, no que se inclúan os de Ribeira, que permita a subministración de gasolina ás embarcacións coas exencións fiscais previstas na lei.

3.Que o goberno municipal estableza, con estes obxectivos, negociacións entre a Consellaría do Mar, empresas subministradoras, Ente Público Portos de Galiza, e representantes do sector pesqueiro de baixura de Ribeira.

A exención de impostos sobre a gasolina é un dereito que se contempla no artigo 51.2 de Lei 38/1992, de 28 de decembro, de Impostos Especiais. Neste artigo establécese a exención do imposto sobre Hidrocarburos para todos os produtos incluídos no seu ámbito obxectivo, sen distinción, que se destinen a utilización como carburante, incluída a pesca, con excepción da navegación privada de recreo.

Neste senso, hai que lembrar que o sector pesqueiro que utiliza gasolina leva moitos anos demandando o mesmo trato que se lle outorga ao gasóleo, exento de impostos para a flota que usa ese carburante.

No noso Concello aproximadamente 400 embarcacións pertencentes ás confrarías de Riberia, Aguiño e Palmeira utilizan a gasolina como carburante. Este combustíbel, a diferenza do gasóleo, aínda contando cun tratamento fiscal específico na lexislación vixente, segue sen posuír, non só nos nosos portos, senón en todos os galegos (agás o da Coruña), un tratamento real como combustíbel profesional.

Esta marxinación obxectiva é especialmente grave nun contexto de crise económica como a que se está a padecer, tamén no sector pesqueiro, no que ademais hai tempo que se está a producir unha suba xeralizada do prezo dos combustíbeis.

Compre, pois, articular as medidas precisas tendentes a aplicar na práctica a minoración do prezo da gasolina nas embarcacións pesqueiras, a través dun mesmo tratamento fiscal, execución do imposto de hidrocarburos, que o gasóleo profesional. En xuño de 2010 un litro de gasolina custa de media 1,20 €. O prezo do litro de gasóleo pesqueiro, aplicada a exención, é de 0, 51 €. A diferenza é considerábel.

Sen embargo, a experiencia levada a cabo polo sector de baixura do porto da Coruña demostra que é posíbel reducir o prezo da gasolina practicamente á metade de existir vontade política. Así, as xestión emprendidas permiten, só neste porto, o subministro de gasolina considerada como combustíbel profesional.

Esta experiencia debe ser trasladada aos portos de Ribeira polo ben e o futuro do noso sector de baixura. Non é aceptábel que existindo a posibilidade de rebaixar substancialmente os prezos dos combustíbeis pola vía legal, non se adopte ningunha medida ao respecto por falta de iniciativa institucional e vontade política tanto da Xunta de Galiza como do propio Concello.

O Plan de Galicia sobre Drogas actual, elaborado polo bipartito, que remataba en 2009 e foi prorrogado por un ano, financia dispositivos tanto de prevención como asistenciais dependentes dos concellos ou de entidades sen ánimo de lucro, que posiblemente se verán seriamente afectados polos recortes previstos polo goberno do PP no novo Plan Galego de Drogas que está elaborando.

En Ribeira estes previsibles recortes afectarán á Unidade Asistencial de Drogodependencias (UAD), formado por un equipo de 12 profesionais que atende a 1.700 doentes, e a outras entidades que realizan labores de prevención nos centros educativos a milleiros de escolares. Lembremos que isto súmase á paralización da construción do Centro de Saúde Mental da Barbanza, adxudicada polo goberno do PP cun orzamento de preto dun millón de euros, que ía a acoller a UAD.

En todo o país son moitas as persoas afectadas polos previsibles recortes que a Consellaría de Sanidade vai a efectuar na rede de drogas, que xa ven aplicando a outras áreas, que ela entende “sobredimensionadas”: arredor de 20.000 doentes e uns 437 profesionais.

Con respecto á asistencia, existen 17 Unidades ambulatorias, dependentes de 13 concellos e de 4 asociacións (ACLAD-Coruña, Alborada-Vigo, Asfedro-Ferroi e Cruz Vermella-Lugo). As asociacións xestionan ademais as Comunidades terapeúticas de Vigo, A Coruña e Ferrol, e contan aproximadamente con 300 profesionais.

Por parte da prevención, hai 64 equipos de prevención en toda Galiza, xestionados na súa maioría por concellos (44 convenios asinados por un total de 118 concellos de toda Galiza e 20 convenios asinados con asociacións). En total 137 profesionais de prevención e incorporación social.

En resposta parlamentar ás deputadas do BNG Ana Luísa Bouza e Ana Pontón, a Xunta considera que “a obra non pode ser executada”, que “a asistencia á poboación na área sanitaria de Ribeira está plenamente atendida” e que “se estudarán no futuro outras posibilidades” tendo en conta “a necesidade conxunta doutros centros na nosa Comunidade”.

Esta resposta deixa en evidencia a nula intención deste Goberno de levar adiante unha obra que fora presupostada e licitada polo anterior Goberno da Xunta pero ADXUDICADA polo goberno actual que preferiu indemnizar á empresa adxudicataria e deixar así á nosa comarca sen este necesario Servizo público.

Temos que denunciar moi especialmente a postura covarde e trapalleira do actual Grupo de Goberno Municipal que, defendendo quen sabe que intereses, rexeitou, no Pleno Municipal de xaneiro, unha iniciativa do BNG que instaba “á Xunta de Galiza á inmediata construción e posta en marcha do Centro de Saúde Mental da Barbanza.”

Deste xeito tamén queda en evidencia o Goberno Municipal do PP que, logo de non facer nada por poñer a disposición os terreos para a construción do Centro (boicoteándoo de feito), pasou, sen rubor, a responsabilidade á Comunidade de Montes de Oleiros! Agora, a resposta da Xunta demostra que esta considera que os enfermos con trastornos psiquiátricos e trastornos aditivos “están ben atendidos na actual Unidade de Condutas Aditivas (UAD) de Ribeira” deixando “para o futuro” o que é unha vella necesidade da sociedade ribeirense e da nosa comarca.

O BNG presentou unha iniciativa parlamentaria denunciando a paralización da construción do Centro de Saúde Mental da Barbanza

Na anterior lexislatura, e como actuación incluída no Plan Estratéxico de Saúde Mental 2006-2011, contemplábase a construción dun centro de saúde mental para a comarca da Barbanza. Neste documento aparecían reflectidas as carencias da Barbanza nesta área sanitaria, sendo o único hospital de Galicia que non conta cunha unidade de saúde mental.

A obra, que foi licitada polo anterior goberno da Xunta nunha resolución con data 2 de marzo de 2009, foi adxudicada de maneira definitiva polo actual goberno do PP na Xunta en resolución de 5 de agosto á empresa “Construcciones en Piedras Sigrás, S.L.”, cun orzamento de 986.574 euros, tendo como prazo de execución 13,5 meses.

Polo tanto, estas obras que aínda non se iniciaron, deberían estar en fase avanzada de construción e rematadas no mes de maio de 2010. Sendo ademais este mesmo goberno quen fixo a adxudicación desta obra, hai que preguntarse entón: adxudicou o goberno do PP na Xunta unha obra sen dispor do terreo para facela? Ou acaso se está utilizado como cortina de fume unha suposta problemática co terreo, que ninguén lle solicitou á Comunidade de Montes de Oleiros, para paralizar unha obra que non hai interese en realizar?

En calquera caso, hai que lembrar que o PP leva preto dun ano gobernando na Xunta de Galiza e a estas alturas xa non valen escusas. Máxime sendo o único hospital de Galiza que non dispón de unidade de saúde mental. Nin o BNG nin a cidadanía da Barbanza vai a consentir máis agravios comparativos en materia de servizos públicos en xeral e saúde pública en particular.