BNG-Ribeira

Blog do BNG de Ribeira.

Iniciativas do Grupo Municipal

Propoñemos medidas para a erradicación dos atropelos

Dominga Brión, Xosé Luís Groveiro e Ana Álvarez no Pleno de decembro de 2010

O BNG de Ribeira ven de presentar sendas iniciativas municipais, diante da Xunta de Goberno Local e diante do Pleno Municipal, polas que propón a adopción urxente dun Plan de actuación para localizar todos os puntos negros e tomar medidas inmediatas para á erradicación dos atropelos en Ribeira, tanto no casco urbano como nas estradas de todo o Concello. Entre eles: a estrada 550 ao seu paso por Oleiros, e ás entradas do casco urbano: Avdas. da Coruña, Ferrol e Malecón, demandando unha actuación especial na Rúa Canarias, en pleno casco urbano de Ribeira, para que se habilite un espazo para peóns en tanto non se dote de beirarrúas.

Tamén propón que entre as medidas a tomar, con dotación de beirarrúas onde falten, se valore especialmente a construción de pasos elevados, pola eficacia demostrada noutros concellos na erradicación de atropelos, e a dotación de semáforos dos que carece o casco urbano de Ribeira.

Máis información: (máis…)

O BNG organiza actos informativos sobre o POL

O BNG de Ribeira está organizando actos por todo o concello para informar á cidadanía da afección do Plan de Ordenación do Litoral (POL) en Ribeira.

Actos Informativos:

Luns, 20, ás 19,00 horas, Aguiño, Salón de Actos Confraría
Luns, 20, ás 21,00 horas, Castiñeiras, Casa da Cultura

Martes, 21, ás 19,00 horas, Olveira, Bar “O Rueiro”
Martes, 21, ás 21,00 horas, Ribeira, Liceo Marítimo

Mércores, 22, ás 19,00 horas, Corrubedo, Casa do Mar
Mércores, 22, ás 21,00 horas, Palmeira, Casa do Mar

Venres, 24, ás 19,00 horas, Artes, Centro Recreativo
Venres, 24, ás 21,00 horas, Carreira, Casa Cultura

Pleno Municipal xuño 2010

Toma de posesión dos 6 concelleiros e concelleiras do BNG de Ribeira

No Pleno Ordinario do Concello de Ribeira do vindeiro luns, día 28 de xuño, debateranse un importante número de iniciativas presentadas polo BNG: 6 mocións e numerosas solicitudes. Cabe indicar que, por unha cuestión organizativa, está limitado o número de mocións a presentar por cada grupo municipal. En concreto ao BNG correspóndenos un máximo de 6, tantas como concelleiros e concelleiras ten o BNG. Lembramos que os plenos son públicos e poden asistir todas aquelas persoas que o desexen.

Preme enriba da iniciativa para obter máis información sobre a mesma.

As mocións son en relación cos seguintes temas:

1.- Centro integrado
2.- Recortes sociales
3.- Melloras na Unidade de Atención a Drogodependencia (UAD) de Ribeira
4.- Creación dun carril bici no Concello de Ribeira
5.- Rebaixa dos prezos da gasolina ás embarcacións pesqueiras profesionais
6.- Agua e saneamento en Oleiros

Reclamámos que se adopten as medidas precisas para rebaixar os prezos da gasolina profesional

O BNG ven de presentar iniciativas no Parlamento Galego e nos concellos da comarca para reclamar que se adopten as medidas precisas para posibilitar a rebaixa dos prezos da gasolina ás embarcacións pesqueiras profesionais que utilizan este combustíbel. Os acordos que se solicitan son os seguintes:

1.Que o Pleno do Concello inste á Xunta de Galiza a adoptar as medidas precisas para posibilitar a aplicación práctica da legalidade vixente a fin de acadar a consideración real da gasolina como combustíbel profesional e, deste xeito, posibilitar a rebaixa dos prezos da gasolina ás embarcacións pesqueiras profesionais que utilizan este combustible no noso Concello.

2.Que se solicite a posta en marcha dun programa de instalación de depósitos e surtidores de gasolina nos portos galegos, no que se inclúan os de Ribeira, que permita a subministración de gasolina ás embarcacións coas exencións fiscais previstas na lei.

3.Que o goberno municipal estableza, con estes obxectivos, negociacións entre a Consellaría do Mar, empresas subministradoras, Ente Público Portos de Galiza, e representantes do sector pesqueiro de baixura de Ribeira.

A exención de impostos sobre a gasolina é un dereito que se contempla no artigo 51.2 de Lei 38/1992, de 28 de decembro, de Impostos Especiais. Neste artigo establécese a exención do imposto sobre Hidrocarburos para todos os produtos incluídos no seu ámbito obxectivo, sen distinción, que se destinen a utilización como carburante, incluída a pesca, con excepción da navegación privada de recreo.

Neste senso, hai que lembrar que o sector pesqueiro que utiliza gasolina leva moitos anos demandando o mesmo trato que se lle outorga ao gasóleo, exento de impostos para a flota que usa ese carburante.

No noso Concello aproximadamente 400 embarcacións pertencentes ás confrarías de Riberia, Aguiño e Palmeira utilizan a gasolina como carburante. Este combustíbel, a diferenza do gasóleo, aínda contando cun tratamento fiscal específico na lexislación vixente, segue sen posuír, non só nos nosos portos, senón en todos os galegos (agás o da Coruña), un tratamento real como combustíbel profesional.

Esta marxinación obxectiva é especialmente grave nun contexto de crise económica como a que se está a padecer, tamén no sector pesqueiro, no que ademais hai tempo que se está a producir unha suba xeralizada do prezo dos combustíbeis.

Compre, pois, articular as medidas precisas tendentes a aplicar na práctica a minoración do prezo da gasolina nas embarcacións pesqueiras, a través dun mesmo tratamento fiscal, execución do imposto de hidrocarburos, que o gasóleo profesional. En xuño de 2010 un litro de gasolina custa de media 1,20 €. O prezo do litro de gasóleo pesqueiro, aplicada a exención, é de 0, 51 €. A diferenza é considerábel.

Sen embargo, a experiencia levada a cabo polo sector de baixura do porto da Coruña demostra que é posíbel reducir o prezo da gasolina practicamente á metade de existir vontade política. Así, as xestión emprendidas permiten, só neste porto, o subministro de gasolina considerada como combustíbel profesional.

Esta experiencia debe ser trasladada aos portos de Ribeira polo ben e o futuro do noso sector de baixura. Non é aceptábel que existindo a posibilidade de rebaixar substancialmente os prezos dos combustíbeis pola vía legal, non se adopte ningunha medida ao respecto por falta de iniciativa institucional e vontade política tanto da Xunta de Galiza como do propio Concello.

Iniciativa Municipal:
2010-06-17-exencions-fiscais-gasolina.pdf

Iniciativa Parlamentar:
2010-06-07-pnlp-adopcion-medidas-gasolina-a-frota.pdf

Pleno Municipal de maio do 2010

Toma de posesión dos 6 concelleiros e concelleiras do BNG de Ribeira

No Pleno Ordinario do Concello de Ribeira do vindeiro luns, día 31 de maio, debateranse un importante número de iniciativas presentadas polo BNG: 6 mocións e numerosas solicitudes. Cabe indicar que, por unha cuestión organizativa, está limitado o número de mocións a presentar por cada grupo municipal. En concreto ao BNG correspóndenos un máximo de 6, tantas como concelleiros e concelleiras ten o BNG. Lembramos que os plenos son públicos e poden asistir todas aquelas persoas que o desexen.

Preme enriba da iniciativa para obter máis información sobre a mesma.

As mocións son en relación cos seguintes temas:

1.- Substitución de canalizacións de auga de fibrocemento
2.- Dotación dunha circunvalación a Ribeira dende a Autovía até o peirao
3.- Instalación dun reemisor das canles de TDT de ámbito local e comarcal
4.- Centro integrado
5.- Recortes sociales
6.- Melloras na Unidade de Atención a Drogodependencia (UAD) de Ribeira

Demandamos unha circunvalación para Ribeira

O BNG presentou unha iniciativa para demandarlle ao Goberno Municipal do PP que inicie as actuacións oportunas para dotar a Ribeira dunha circunvalación dende a autovía até o peirao.

Ribeira precisa dotarse de todas as infraestruturas necesarias para o seu desenvolvemento económico e social; deste xeito crearase emprego e riqueza, e mellorarase a calidade de vida de todos os veciños e veciñas, algo moi importante en momentos de crise coma os que estamos padecendo.

É prioritario para o noso Concello tanto diversificar a súa economía, como apoiar a un sector estratéxico para nós como é o complexo mariño-industrial; polo tanto, a creación de infraestructuras que propicien a potenciación do noso porto pesqueiro e comercial debe ser unha das prioridades que a administración local debe xestionar: a dotación dun plan de usos do porto, dunha nova e moderna lonxa, de diversos servizos para a frota de baixura e demais usuarios/as das instalacións portuarias, sen esquecer un servicio de vixilancia no porto son, entre outras, necesidades que se deben demandar con urxencia.

Neste senso, consideramos que xestionar a construción dunha circunvalación para Ribeira dende a autovía ata o porto é unha obriga que non debe demorar por máis tempo o goberno deste Concello. A que existe trazada como tal no actual Plan Xeral de Ordenación Municipal (PXOM) pasa polo medio de Abesadas. Polo tanto, valería como unha gran avenida pero non como circunvalación. Non se debe facer unha circunvalación polo medio do casco urbano. Agora que está o PXOM en revisión é o momento de dar os pasos necesarios para incorporar ao mesmo un novo trazado.

Ademais de potenciar o noso peirao, con esta infraestrutura faríase máis fluído o tráfico no casco urbano de Ribeira, que en horas punta e os sábados pola mañá resulta tremendamente dificultoso, converténdose na tempada estival en misión francamente imposíbel.

Iniciativa Municipal:
2010-04-16-circunvalacion-para-ribeira.pdf

O luns tod@s a Compostela!!

Letras Galegas 2010

Os autobuses sairán ás 10.00 horas dende a estación de autobuses con paradas en todos os concellos da Barbanza.

Iniciativa Municipal

O BNG presentou iniciativas nos concellos da Barbanza para solicitar que se apoie activamente a manifestación convocada pola Plataforma Queremos Galego en defensa do noso idioma que terá lugar o próximo 17 de Maio, en Santiago de Compostela.

Tamén reclamará ao Pleno que rexeite as “Bases para o Decreto de Plurilingüismo” feitas públicas pola Consellaría de Educación e Ordenación Universitaria, e que reafirme o compromiso municipal co consenso estabelecido, no ámbito do ensino, no Plano Xeral de Normalización da Lingua Galega, aprobado de xeito unánime polo Parlamento de Galiza en setembro de 2004.

Do mesmo xeito, demandarase da Corporación que manifeste a súa adhesión ao texto da “Iniciativa Popular pola Garantía dos Dereitos Lingüísticos”, promovida pola Plataforma Queremos Galego.

Reclamamos que non se fagan recortes no Plan de Galicia sobre Drogas

O BNG ven de presentar dúas iniciativas no Parlamento Galego, para solicitarlle ao goberno do PP da Xunta de Galiza que non faga recortes no financiamento dos dispositivos incluídos no Plan de Galicia sobre Drogas, que vai a afectar á UAD de Ribeira, e, ao mesmo tempo, que informe dos prazos e criterios de participación na elaboración do novo Plan.

O BNG tamén presentará iniciativas diante do Goberno do PP de Ribeira e do Pleno da Corporación para reclamar que se manteña o servizo que presta a UAD de Ribeira e se melloren as súas instalacións.

O Plan de Galicia sobre Drogas actual, elaborado polo bipartito, que remataba en 2009 e foi prorrogado por un ano, financia dispositivos tanto de prevención como asistenciais dependentes dos concellos ou de entidades sen ánimo de lucro, que posiblemente se verán seriamente afectados polos recortes previstos polo goberno do PP no novo Plan Galego de Drogas que está elaborando.

En Ribeira estes previsibles recortes afectarán á Unidade Asistencial de Drogodependencias (UAD), formado por un equipo de 12 profesionais que atende a 1.700 doentes, e a outras entidades que realizan labores de prevención nos centros educativos a milleiros de escolares. Lembremos que isto súmase á paralización da construción do Centro de Saúde Mental da Barbanza, adxudicada polo goberno do PP cun orzamento de preto dun millón de euros, que ía a acoller a UAD.

En todo o país son moitas as persoas afectadas polos previsibles recortes que a Consellaría de Sanidade vai a efectuar na rede de drogas, que xa ven aplicando a outras áreas, que ela entende “sobredimensionadas”: arredor de 20.000 doentes e uns 437 profesionais.

Con respecto á asistencia, existen 17 Unidades ambulatorias, dependentes de 13 concellos e de 4 asociacións (ACLAD-Coruña, Alborada-Vigo, Asfedro-Ferroi e Cruz Vermella-Lugo). As asociacións xestionan ademais as Comunidades terapeúticas de Vigo, A Coruña e Ferrol, e contan aproximadamente con 300 profesionais.

Por parte da prevención, hai 64 equipos de prevención en toda Galiza, xestionados na súa maioría por concellos (44 convenios asinados por un total de 118 concellos de toda Galiza e 20 convenios asinados con asociacións). En total 137 profesionais de prevención e incorporación social.

Nova na Voz:

O Plan de Ordenación do Litoral afecta ao 75% de Ribeira

Plan de Ordenación do Litoral en Ribeira

O BNG de Ribeira rexeita o actual Plan de Ordenación do Litoral (POL) presentado polo goberno do PP da Xunta, e lamenta que o goberno do PP de Ribeira non informara á cidadanía afectada, xa que este documento inclúe no seu ámbito aproximadamente 52 Km2 dos 69 Km2 de superficie total do municipio, o que supón máis do 75% do concello.

Por esta razón, o BNG solicitou que se refaga de novo de tal xeito que respecte o actual PXOM, permita as ampliacións necesarias na revisión que se está efectuando do mesmo, tanto de chan urbano como de núcleo rural e reduza, onde sexa posíbel, a protección de corredor.

O goberno do PP está tramitando o Plan de Ordenación do Litoral que vai a fixar as directrices para a ordenación territorial dos municipios costeiros de Galiza e a propiciar a ordenación a gran escala dos usos do solo. Trátase dun documento moi importante, pois as súas determinacións terán forza vinculante e prevalecerán sobre as establecidas no planeamento municipal, que deberá ser obxecto de adaptación.

O POL afecta a chans situados a unha distancia da costa de ata 3.000 m, superando con moito o actual límite cautelado de 500 m pola Lei 6/2007, do 11 de maio, de medidas urxentes en materia de ordenación do territorio e do litoral de Galicia. Neste momento atópase en fase de consultas aos Concellos aos que foi remitido con data 25 de xaneiro de 2010, durante o prazo de dous meses, prorrogado por un mes máis, que remata o 3 de maio de 2010, para a emisión do correspondente informe.

Este Plan afecta en Ribeira gravemente a numerosas vivendas tanto no casco urbano, como en todas as parroquias, agás Oleiros. En total afecta a 3.337.202 m2 dos 5.962.574 m2 de chan urbano existentes, o que se corresponde co 56% do chan urbano municipal. Con respecto ao chan de núcleo rural, afecta a 3.597.684 m2 dos 5.713.593 m2 de superficie segundo o PXOM, o que representa o 63% do chan de núcleo rural municipal.

Cabe lembrar que a clasificación dun chan como urbano é un acto regulado, establecido por lei. Se o POL cambia a súa regulación establecendo a prohibición do uso edificatorio, pódese incorrer en responsabilidade patrimonial ao lesionarse ou limitarse dereitos adquiridos polos propietari@s.

Calendario de actos informativos:

Dende o BNG lamentamos que ante unha afectación de tal calado o goberno do PP de Ribeira non tivera a ben informar á cidadanía desta situación. Por esta razón está realizando actos informativos por todas as parroquias do Concello. Xa se realizaron en Aguiño, Castiñeiras, Ribeira, Palmeira e Carreira. Na vindeira semana os actos informativos realizaranse nas seguintes parroquias: o luns, 3 de maio, en Artes, no Centro Recreativo ás 20,30 horas; o martes, día 4, en Corrubedo na Casa do Mar, ás 20,30 horas; e o Mércores, día 5 en Olveira, no Bar O Rueiro, ás 20,30 horas.

Máis información:

Toda a información a respecto deste documento se pode descargar dende esta páxina:
Plan de Ordenación do Litoral

Premendo nas seguintes imaxes pódese ver a afección en cada unha das parroquias. O chan urbano aparece delimitado pola liña de cor lila e o de núcleo rural pola de cor vermello. A parte deste solo que aparece raiada está afectado polo POL.

Aguiño

Artes

Carreira

Castiñeiras

Corrubedo

Olveira

Palmeira

Ribeira

Pleno Municipal abril 2010

Toma de posesión dos 6 concelleiros e concelleiras do BNG de Ribeira

No Pleno Ordinario do Concello de Ribeira do vindeiro luns, día 26 de abril, debateranse un importante número de iniciativas presentadas polo BNG: 6 mocións e numerosas solicitudes. Cabe indicar que, por unha cuestión organizativa, está limitado o número de mocións a presentar por cada grupo municipal. En concreto ao BNG correspóndenos un máximo de 6. Lembramos que os plenos son públicos e poden asistir todas aquelas persoas que o desexen.

Preme enriba da iniciativa para obter máis información sobre a mesma.

As mocións son en relación cos seguintes temas:

1.- Inventario de camiños de titularidade municipal
2.- Melloras na atención sanitaria en Ribeira e Barbanza
3.- Substitución de canalizacións de auga de fibrocemento
4.- Dotación dunha circunvalación a Ribeira dende a Autovía até o peirao
5.- Instalación dun reemisor das canles de TDT de ámbito local e comarcal
6.- Servizo Galego de Igualdade