Europeas 2009

Nunha loita absolutamente desigual, o BNG presentouse a estas eleccións Europeas co obxectivo de ter presenza no Parlamento Europeo, do que estivo ausente na última lexislatura. A pesar de todas as dificultades coas que nos atopamos, un milleiro de persoas en Ribeira déronnos o seu apoio situándonos por enriba da media provincial e galega obtida polo BNG. A todas elas lle queremos agradecer, unha vez máis, a confianza que depositaron en nós. O seu respaldo é decisivo para que, xunto con máis dun cento de milleiros de galegos e galegas, as demandas de todas e todos nós se escoiten no Parlamento Europeo.

A todos os compañeiros e compañeiras que durante estes días de campaña traballaron arreo colocando bandeirolas, pasando megafonías, participando en mitins, repartindo información a pé de rúa, ou mesmo, casa por casa, mil grazas. Todo ese esforzo valeu a pena. Agora compre empregarse a fondo nos dous anos que quedan para conseguir que ese 57% de homes e mulleres de Ribeira que non foron a votar nos dean o seu apoio, e poidamos gañar así as Municipais do 2011.

O portavoz nacional do BNG, Guillerme Vázquez, participou no serán de onte nun mitin en Ribeira no que tamén participaron a portavoz municipal, Dominga Brión, e a número un do BNG na lista ás eleccións europeas, Ana Miranda.

O BNG reiterou en Ribeira o seu compromiso cos sectores produtivos, nomeadamente co sector pesqueiro, e co dereito dos galegos e galegas a poder vivir e a producir na nosa terra.

A portavoz municipal do BNG de Ribeira, Dominga Brión, lembrou que o sector mar-industria é o motor da economía, non só da comarca, senón tamén deste país. Indicou que o BNG reclamará no Parlamento Europeo un novo estatus institucional para o noso país en materia pesqueira. Que se nos permita participar como país nas institucións comunitarias onde se adoptan decisións que afecten ao sector.

O BNG impulsará a nosa pesca, o marisqueo e a acuicultura, tanto do mexillón como doutras especies, vinculada á creación de máis postos de traballo, á mellora da comercialización e á innovación das técnicas de cultivo.

Tamén defenderá o acceso a fondos vinculados á mellora do marisqueo e ao saneamento e depuración das nosas augas residuais, para que concellos coma o de Ribeira, que leva máis de 20 anos consecutivos gobernados polo Partido Popular teñan, por fin, o saneamento integral que necesitan e que o goberno do PP aínda non foi quen de xestionar.

Dominga Brión indicou que a presenza do BNG no Parlamento Europeo servirá para impulsará a estabilidade no emprego e condicións laborais dignas para todos os traballadores e traballadoras. Algo de moita importancia en situacións de crises como a que estamos a vivir. A clase traballadora non pode pagar as consecuencias dunha crise que non provocou, concluíu.

A candidata do BNG ás eleccións ao Parlamento Europeo, Ana Miranda, denunciou o “dúmping social”* que se practica no sector pesqueiro cos traballadores extracomunitarios. Neste sentido, adiantou que o BNG demandará no Parlamento Europeu que “as axudas públicas aos armadores estean vinculadas á mellora das condicións sociolaborais das tripulacións”.

Ana Miranda reuniuse esta tarde en Santiago de Compostela co presidente da Asociación Española de Titulados Náutico Pesqueiros (AETINAPE), Manuel Muñiz, para analizar as demandas do sector.

Miranda rexeitou que “empresas que reciben cuantiosas subvencións públicas practiquen o dúmping social, enrolando a tripulantes extracomunitarios por salarios ínfimos”A candidata do BNG mostrou o seu rexeitamento a que “empresas que reciben cuantiosas subvencións públicas practiquen o dúmping social, enrolando a tripulantes extracomunitarios por salarios ínfimos”. A este respeito, o presidente de AETINAPE lembrou que “buques que até hai uns meses enrolaban unha media de 6 tripulantes españois por barco, agora na súa maioría só contan con 1 ou 2 tripulantes de orixe española”.

Por outra parte, Ana Miranda tamén amosou a oposición do BNG á reducción da capacidade pesqueira galega a través de desguaces, unha medida que defende o Comisario Europeo de Pesca, e que “non se debería facer con diñeiro público porque destrúe centros de empregos a cambio de reducir aínda máis a nosa capacidade pesqueira”.

Ana Miranda tamén coincidiu co presidente de AETINAPE na necesidade de que haxa unha homologación dos títulos marítimo-pesqueiros na Unión Europea. Ademais, a candidata do BNG ás eleccións ao Parlamento Europeu amosou o seu compromiso para traballar pola creación dunha Axencia de Inspección Pesqueira Europea, de carácter supraestatal. A candidata do BNG comprometeuse a trasladar estas demandas tanto ao Parlamento Europeo como á Comisión Europea de Pesca “tan pronto tome posesión como eurodeputada do BNG”.