EDAR de Ribeira

“A Asociación Sagres, en Defensa do Litoral felicita ao presidente do goberno galego polas medidas de protección da costa, entre elas, a creación de novas áreas de mariña protexidas e a recuperación de Cortegada. Pero tamén desexa que non se destrúan as zonas que están protexidas e en pleno rendemento pesqueiro, como é o caso de Aguiño.

Por iso se sorprende que sexa precisamente agora cando mellores e maiores medidas de protección ambiental se están a tomar (a Lei de Medidas Urxentes de Potección do Litoral, unha normativa creada para frear a deterioración das nosas costas, a Lei de impacto paisaxístico) que Medio Ambiente queira construír unha macrodepuradora e unha piscifactoría, sen estudos de impacto ambiental, de sostibilidade, de correntes mariñas, de monotorización e incumprindo as garantías mediambientais, socioculturais, urbanísticas, técnicas e biolóxicas e que poría en perigo un hábitat natural de especial sensibilidade, e a industria de pesca e marisqueo artesanal que vive de sempre aquí.

Un proxecto que de levarse a cabo será devastador para esta zona, referente galego e europeo da pesca tradicional e o marisqueo, que vén de ser demostradamente sustentable e que dá traballo digno a toda a poboación de Aguiño.

Recordan así mesmo que a Terra non entende de fronteiras e que este lugar é o corredor natural entre o Parque Nacional das Illas Atlánticas e o LIC Corrubedo, e onde habitan especies mariñas protexidas pola directiva Habitat (entre outras, o delfin mular e a marsopa común), os arrecifes rochosos somerxidos para os que a Comunidade Europea reclama atención prioritaria (Código 1170 da Directiva 92/43/CEE) e en terra especies ameazadas, en concreto a Omphalodes littoralis, segundo o Catálogo Galego de Especies Ameazadas.

Propoñen unha depuración medioambientalmente posible, unha depuración que non afecte á degradación da calidade das augas pola contaminación orgánica, química e bacteriolóxica e pola que se asegure, de acordo cos estudos que aínda non se fixeron, o mellor emprazamento para garantir o mínimo impacto e unha rápida dilución no medio receptor.

Isto só será posible se cada pau aguanta da súa vela e se realizan os estudos preceptivos e necesarios, ou por mellor dicir se se fai unha depuración por parroquias e non elixindo un punto, polo demais ata agora primixenio, para convertelo no punto negro da ría.
Disque hai que depurar para non seren declarados zona C, parécenos ben. O que non entendemos e que nós sendo zona A, vaiamos ser os elixidos para instalar un punto negro na ría.

Nós que fomos capaces, coas nosas mans e cos nosos barcos, a parar un desastre coma o do Prestige, non imos permitir que nos convertan nun gran vertedoiro.

Por todo isto invita a Emilio Pérez Touriño a visitar a zona para que se faga eco da preocupación dos veciños e mariscadores e medie neste asunto.”

O venres, día 17 de agosto, a lonxa de Aguiño acolleu unha xornada informativa a que acudiron preto de 500 persoas, atendendo a convocatoria da Comisión de veciños de Aguiño. Á reunión acudiu Daniel Vispo, Secretario Xeral de Adega, que estivo acompañado na mesa por representantes da Comisión.

A esta reunión acudiu unha ampla representación do BNG. A comisión de veciños esta tramitando a súa legalización para constituírse na Asociación Sagres. Durante a xornada unhas duascentas persoas formalizaron a súa adhesión á entidade.

A Comisión Veciñal de Aguiño manifestouse satisfeita polo acordo unánime acadado pola Corporación Municipal o pasado luns ante a iniciativa do BNG a respecto da EDAR de Ribeira. Aínda así, decidiu continuar co seu calendario de mobilizacións ata que a Consellería de Medio Ambiente se pronuncie a este respecto.

Por esta razón, onte concentráronse diante do Concello máis dun cento de persoas e continuaron a entrega de sinaturas comezada o pasado luns. En total presentáronse unhas mil cincocentas, aproximadamente. Varios representantes do BNG estivemos alí apoiando as súas reivindicacións.

O BNG vai a asistir a reunión veciñal convocada pola Comisión de Veciñ@s de Aguiño para o vindeiro venres, 27 de xuño, ás 20:30 horas, na Casa do Mar de Aguiño. Nesta reunión, aberta a toda a cidadanía, á Comisión informará das repercusións que traerá consigo a instalación dunha depuradora das características da que se pretende ubicar en Couso, nun entorno coma este.