EDAR de Ribeira

É unha vella demanda do BNG, e para nós algo prioritario, que Ribeira conte co necesario saneamento integral das súas augas residuais. Agora ben, tamén entendemos que non se pode facer de calquera xeito.

Tivemos coñecemento pola prensa que o alcalde e a responsábel de Augas de Galicia acordaron un emprazamento para a EDAR de Ribeira no Polígono de Couso, en Aguiño. Descoñecemos os termos do acordo acadado, pois o alcalde non tivo a delicadeza de informar persoalmente aos representantes dos grupos municipais democraticamente elixidos dun tema de tanta importancia para o Concello, por certo, algo cada vez máis frecuente. Iso si, lamentamos que non tivera a mesma vontade política co anterior goberno da Xunta, ao que sempre lle puxo trabas, tanto neste tema coma noutros moitos, sirvan como exemplo, o Polígono da Barbanza ou o Centro de Alzheimer de Ribeira.

En todo caso, agardamos que este acordo faga valer o acadado por unanimidade no Pleno do 30 de xullo do 2007. Cabe lembrar que todos os Grupos políticos con representación no Concello de Ribeira, incluído o PP, votaron a favor dunha iniciativa do BNG que recolle as demandas veciñais, e que nós presentamos en Pleno en base a un compromiso acadado nunha xuntanza organizada pola Comisión Veciñal de Aguiño, hoxe Asociación Sagres, o 19 de xullo do 2007, na que participamos xunto coas Voceiras do PP e IPdeR e co Voceiro do PSOE.

1. Que o proxecto da EDAR de Ribeira se someta aos trámites de Avaliación de Impacto Ambiental e de Avaliación Estratéxica da Sostibilidade.

2. Que se solicite da Xunta de Galicia unha depuradora específica para o Polígono Industrial de Xarás.

3. Que, en todo caso, o emisario se prolongue até augas profundas, fóra da enseada, en augas con correntes oceánicas, onde se asegure o mínimo impacto e unha rápida dilución e difusión no medio receptor.

4. Que o incremento na intensidade de uso do espazo destinado á planta depuradora vaia acompañado das preceptivas medidas compensatorias.

Se tanto a veciñanza como todos os Grupos Municipais foron capaces de chegar a este acordo de mínimos, non se entendería agora posturas contrarias por parte do alcalde de Ribeira. Non podemos esquecer que a zona onde pretende ubicarse a EDAR é a carón do Parque Nacional da Illas Atlánticas, do Parque Natural, da Rede Natura, dunha área costeira de grande riqueza pesqueira e marisqueira e a carón da boca da Ría da Arousa, unha das máis produtivas do mundo. Estamos falando dun espazo dos máis singulares de Europa e que conta cun alto grao de protección, polo tanto, todas as medidas que se adopten para non poñer en perigo toda esta riqueza son poucas.

Agardamos, pois, que o acordo acadado entre o máximo responsábel do Goberno Municipal e á representante do Goberno Galego respecte o acordo de mínimos unanimemente acadado, para que a necesaria e urxente depuración das augas residuais se faga con todas as garantías.

O BNG de Ribeira reuníuse coa Asociación Sagres de aguiño para tratar a situación da EDAR de Ribeira

O BNG solicita que se respecte e se faga valer o acordo plenario unánime do día 30 de xullo do 2007 e, ao mesmo tempo, que o Goberno Municipal do PP realice as xestións necesarias diante da Consellería de Medio Ambiente para que Ribeira poida contar canto antes co saneamento integral.

Na tarde de onte a voceira municipal do BNG de Ribeira, Dominga Brión, e os membros do Grupo Municipal Anxeles González Cruxeiras, Ana Álvarez e Luís Teira, acudiron á reunión convocada no Auditorio de Aguiño pola Asociación Sagres. A esta xuntanza asistiron tamén representantes do resto dos grupos municipais.

Neste encontro tratouse durante máis de hora e media sobre a situación na que se atopa neste momento o proxecto da EDAR de Ribeira, elaborado pola Consellería de Medio Ambiente en base á proposta de localización en Pinisqueira que inicialmente acordou a Xunta de Goberno Local do PP en sesión celebrada o 9 de febreiro do 2006.

Dende o BNG manifestámolle a nosa preocupación porque, un ano despois da entrevista mantida co Conselleiro de Medio Ambiente, aínda non se lle remitira formalmente dende o concello a terceira proposta de localización para a EDAR (antes de chegar a Conresa á dereita) presentada na reunión celebrada con él o 25 de outubro de 2007, pese a que o Alcalde sempre afirmara o contrario, a última vez no Pleno ordinario celebrado o pasado 27 de outubro.

Indicámoslle que este feito foi recoñecido polo Alcalde na Xunta de Voceiras/os celebrada o pasado día 4 de novembro, ante a demanda do BNG para que se lle facilitara copia do documento remitido á Consellería de Medio Ambiente. En resposta á nosa insistencia na importancia de efectuar ese envío formal, o alcalde comprometeuse á súa remisión oficial (por escrito, con rexistro de saída), compromiso que tamén ratificou o voceiro do PSOE na reunión celebrada onte.

Tamén lle informamos ás persoas asistentes que o BNG ten presentado sendas iniciativas diante da Xunta de Goberno e do Pleno da Corporación solicitando que se respecte e se faga valer o acordo acadado por unanimidade de toda a Corporación Municipal de Ribeira o día 30 de xullo do 2007 e, ao mesmo tempo, que o Goberno Municipal do PP realice as xestións necesarias diante da Consellería de Medio Ambiente para acadar un entendemento a fin de que o Concello de Ribeira poida contar canto antes co saneamento integral para as súas augas residuais da maneira máis sostíbel e consensuada posíbel.

Por último, temos que lamentar que a representante do grupo popular só se comprometera a darlle traslado ao alcalde do alí ocorrido, pese a insistencia dos membros da Asociación Sagres, do BNG e do resto dos grupos da corporación en ofrecer a súa colaboración e acadar un compromiso conxunto para avanzar na búsqueda de solucións na liña de acadar o saneamento integral para o Concello de Ribeira. Alegando compromisos familiares, a voceira popular dou por rematada a sesión obrigando ao resto dos asistentes a abandonar o lugar da reunión, o Auditorio de Aguiño, ao ser ela mesma a encargada de pechar o local.

Un ano despois volvemos a asistir ao fogo cruzado de declaracións acusatorias e ameazantes entre a Consellaría de Medio Ambiente e o Goberno do PP de Ribeira a respecto da EDAR, que tanto a mesma como o Goberno Municipal pretenden instalar en Aguiño (o ano pasado a estas alturas estabamos na mesma tesitura). Mentres tanto, a cidadanía de Ribeira e a de toda a Ría da Arousa, ten que padecer as consecuencias derivadas de que quen nos goberna non fixera todo o necesario, alomenos até o de agora, para que as augas residuais do noso Concello conten cun sistema de depuración acaído.

Dende o BNG de Ribeira reclamamos un pouco de cordura e solicitamos que se faga valer o acordo acadado por unanimidade de toda a Corporación Municipal de Ribeira o día 30 de xullo do 2007. Cabe lembrar que todos os Grupos políticos con representación no Concello de Ribeira, incluído o PSOE, votaron a favor dunha iniciativa do BNG que recolle as demandas veciñais, e que nós presentamos en Pleno en base a un compromiso acadado nunha xuntanza organizada pola Comisión Veciñal de Aguiño, hoxe Asociación Sagres, o 19 de xullo do 2007, na que participamos xunto coas Voceiras do PP e IPdeR e co Voceiro do PSOE.

O acordo adoptado por unanimidade foi o seguinte:

1. Que o proxecto da EDAR de Ribeira se someta aos trámites de Avaliación de Impacto Ambiental e de Avaliación Estratéxica da Sostibilidade.

2. Que se solicite da Xunta de Galicia unha depuradora específica para o Polígono Industrial de Xarás.

3. Que, en todo caso, o emisario se prolongue até augas profundas, fóra da enseada, en augas con correntes oceánicas, onde se asegure o mínimo impacto e unha rápida dilución e difusión no medio receptor.

4. Que o incremento na intensidade de uso do espazo destinado á planta depuradora vaia acompañado das preceptivas medidas compensatorias.

Se tanto a veciñanza como todos os Grupos Municipais foron capaces de chegar a este acordo de mínimos, non se entenden agora posturas de enfrontamento e mesmo ameazantes na prensa por parte de quen nos goberna que só poden traer problemas para toda a sociedade ribeirense e arousán.

Considerando fundamental abordar o saneamento integral do noso Concello, débese valorar tamén que o xeito de levalo a cabo non debe hipotecar o futuro do noso patrimonio natural, económico e social. Pensamos que decisións non acaídas tomadas ata o momento non deben impedir avanzar nun acordo que supoña acadar o obxectivo fundamental (o saneamento integral) da maneira máis sostible e consensuada posible.

Baixo esta premisa, queremos, pois, facer novamente un chamamento para que o Goberno Municipal e Consellaría de Medio Ambiente cheguen a un entendemento e Ribeira poida contar canto antes coa mellor depuración posíbel para as súas augas residuais.

O pasado xoves, día 25 de outubro, recibiunos o Conselleiro de Medio Ambiente, Manuel Vázquez, á portavoz do BNG, Dominga Brión, ó alcalde e ás distintas voceiras municipais, agás ó voceiro do PSOE, que non asistiu. Na xuntanza tamén estiveron presentes os directores xerais de Augas de Galiza, e Conservación da Natureza, así como o delegado provincial de Medio Ambiente na Coruña.

Na anterior reunión que mantivemos co Conselleiro o 13 de xullo, comprometérase a reunirse de novo coa delegación ribeirense na primeira quincena de setembro, despois de estudar o cambio de ubicación da depuradora, de Pinisqueira a carón de Conresa, en Couso, así como o resto de alegacións presentadas. A este retraso no cumprimento do seu compromiso hai que engadirlle que esta reunión veu precedida de distintas declaracións na prensa que xa nos facían albiscar a falta de compromiso político do PSOE cun saneamento racional do noso Concello.

Durante a reunión, que se prolongou por máis dunha hora, a portavoz do BNG, Dominga Brión, fixo referencia ao acordo plenario unánime da Corporación Municipal de 30 de xullo, insistindo na necesidade dunha depuradora específica para a depuración das augas residuais do polígono de Xarás, lembrando que no anteproxecto da EDAR que elaborou a Consellaría, a carga residual industrial representa o 50% da carga contaminante que a depuradora terá que tratar.

A pesar de que tanto a veciñanza como todos os Grupos Municipais fomos capaces de chegar a este acordo plenario de mínimos, ao único ao que se comprometeu o Conselleiro de Medio Ambiente é a estudar outra posíbel ubicación para a EDAR, antes de chegar a Conresa á dereita, ao non considerar idónea a proposta feita na anterior reunión.

Cabe lembrar que aínda que a Consellaría di que non contemplan a construción dunha depuradora para o Polígono de Xarás, na práctica si lla vai a facer en Couso, xa que ten que facer unha depuradora o dobre de grande; a isto haberá que engadirlle os problemas que vai a traer o traslado desta carga contaminante até alí e mesmo a súa depuración conxunta coas augas residuais urbanas. Para máis, a cidadanía no seu conxunto teremos que financiar os custos da depuración dunha contaminación procedente da actividade empresarial, en contra do principio de “quen contamina paga”, que hoxe está a guiar toda a política de responsabilidade ambiental.

Dende o BNG de Ribeira consideramos que despois de tantos anos demandando o saneamento integral do noso Concello, os e as ribeirenses no seu conxunto temos dereito ao mellor saneamento posíbel. Aínda tendo en conta o esforzo económico que vai a facer a Consellería de Medio Ambiente (23 millóns de € só na construción da EDAR), consideramos que o anteproxecto que presenta, a proposta do Goberno do PP de Ribeira, é mellorábel. Agardamos, pois, que dende esta Consellaría de responsabilidade do PSOE teñan en consideración tanto as alegacións presentadas, como a mobilización social que este anteproxecto está a xerar, así como o acordo plenario de mínimos acadado pola Corporación Municipal do 30 de xullo, a iniciativa do BNG de Ribeira, recollendo a proposta veciñal.