Autonómicas 09

Encontro co sector pesqueiro de Ribeira

Xuñ 5th, 2009

Encontro do BNG co sector pesqueiro de Ribeira

O BNG reuniuse en Ribeira co sector pesqueiro para darlle traslado do programa co que se presenta ás eleccións Europeas, escoitar as súas demandas e reiterar o compromiso do nacionalismo galego co sector

O portavoz parlamentar do BNG, Carlos Aymerich, e a voceira municipal, Dominga Brión, reuníronse na tarde de onte con representantes do sector pesqueiro de Ribeira para reiterarlle o compromiso do BNG con este sector estratéxico para a economía de Ribeira e do país. Na reunión tamén participaron o responsábel local do BNG, Xosé Alberte Lorenzo, e os concelleiros, Xosé Luís Groveiro e Francisco Ayaso, así como outros membros da organización.

Por parte do sector, asistiron á xuntanza representantes da práctica totalidade das asociacións do mar de Ribeira, entre os que estaban os patróns maiores das confraría de Ribeira, Aguiño e Palmeira, os presidentes da Asociación do Arrastre e de Armadores de Ribeira e a xerente da Cooperativa do Mar.

Nos transcurso da reunión, que se prolongou por máis de hora e media, deuse conta do programa con que o BNG se presenta ás eleccións Europeas, especialmente no relativo á pesca, recalcando a importancia de que Galiza estea presente no Parlamento Europeo con voz, con voto e mesmo con veto, algo que só será posíbel se está alí o BNG.

Por parte do sector, puxéronse enriba da mesa as problemáticas ás que se enfrontan no día a día. Fixeron fincapé na necesidade de facer un maior control das importacións de peixes e mariscos e mellorar as canles de comercialización dos produtos de primeira calidade cos que contamos, así como, de atallar o furtivismo. O saneamento integral da ría, o incremento da potencia dos motores, ou a adopción de medidas para efectivizar á subvención da gasolina foron, entre outras, ás problemáticas tratadas.

Pola nosa parte, reiteramos o compromiso do BNG co sector e comprometémonos a seguir dándolle traslado das súas problemáticas ás institucións nas que temos representación, agardando presentar moitas delas directamente no Parlamento Europeo a partires do 7 de xuño.

Graciñas polos apoios recibidos e adiante co BNG!

Mar 5th, 2009

by Domi.

No comments yet

Despois da “tormenta perfecta” na que nos vimos envoltos, quero que as miñas primeira palabras sexan de gratitude e de alento para os compañeiros e compañeiras militantes e simpatizantes do BNG que dedicaron moitas horas do seu tempo de lecer para traballar arreo na consolidación do proxecto nacionalista en Ribeira, na Barbanza e en todo o país. Fomos moitas as persoas que traballamos durante estes tres anos e medio para que a Barbanza conte con moitos servizos dos que carecía até fai moi pouco. Hoxe temos unha autovía, chan industrial en marcha, fibra optica, melloras no tendido electrico, centros de día, melloras no Hospital de Barbanza, galescolas, locais de ensaio…

Fomos moitas tamén as que durante estes días de campaña traballamos arreo para explicarlle á cidadanía os nosos proxectos de futuro: aos compañeiros e compañeiras que lle quitastes horas ao lecer e mesmo ao sono, e moi especialmente aos que até sacrificastes días de vacacións para colaborar na campaña, mil grazas.

Aínda que non o pareza, ese esforzo non foi en vano, preto de 3.000 persoas en Ribeira e máis de 8.000 en toda a comarca, o 21%, valoraron o noso traballo e confiaron en nós dándonos o seu respaldo a pesar da campaña máis sucia que se recorda levada a cabo polo Partido Popular.

Concretamente en Ribeira 2.683 papeletas e o 18,53% do voto son a proba da confianza dunha boa parte do electorado aos que lle debemos gratitude eterna. Os mellores resultados obtivémolos no casco urbano, cunha media do 19,67%, onde varias mesas superaron o 21%, chegando a rozar o 24% nunha delas. Igualmente en Oleiros, onde obtivemos un importante incremento do número de apoios con máis do 23% do voto. Tamén en Carreira a média foi de máis do 20%, superando o 25% nunha delas. Mesmo en Aguiño rozamos o 22% nunha das mesas e en Artes o 21%.

Aínda así, é obvio que os resultados do pasado domingo non son os agardados pero, como na canción de José Afonso, “o povo é quem máis ordena”. A verdade é que falaou alto e claro e toca, pois, acatar a súa vontade.

Para esta nova etapa a cidadanía decideu que estiveramos na oposición e dende aí continuaremos a facer o noso traballo coa mesma dedicación coa que sempre o fixemos. É certo que se perdeu unha gran oportunidade de consolidar os proxectos transformadores iniciados. Haberá tempo para analisar por qué a cidadanía non perciviu os cambios positivos efectuados. Teremos que analisar de vagar cales foron os erros cometidos e correxilos para que non volvan a repetirse.

Agora, dende a oposición, fiscalizaremos o traballo da Xunta para que en Ribeira e na Barbanza o Partido Popular non volva ás andadas. Estaremos pendentes de que se rematen todos os proxectos iniciados: o centro de alzheimer de Ribeira, o chan industria, o saneamento da Ría, que continúen as melloras no Hospital da Barbanza, que se fagan as galescolas, os centros de día e os locais de ensaio que faltan, que se efectúen as melloras portuarias e a nova lonxa de Ribeira, a circunvalación, o mercado de abastos, a estación de autobuses… Tres anos e medio non deron para rematar con todas as eivas herdadas. Veremos se o PP é capaz de rematar o empezado.

Queda, pois, moito que facer. Son moitos os homes e mulleres de Ribeira, da Barbanza e da Galiza que confiaron en nós e aos que non podemos defraudar. Moito ánimo a todos e a todas e adiante co BNG!!

Resultados Galegas 2009, Ribeira:
galegas09.pdf

As políticas de emprego, igualdade e benestar

Feb 20th, 2009

by Domi.

1 comment

Mitin de Palmeira

O BNG deu conta en Palmeira das políticas de emprego, igualdade e benestar polas que quere seguir apostando dende o vindeiro goberno da Xunta de Galiza

Dominga Brión, candidata do BNG ao Parlamento Galego, acompañada por Rubén Cela, Director Xeral de Xuventude, Luís Teira, concelleiro, e Plácido Betanzos, referente histórico do BNG de Ribeira, achegáronse onte ao Bar de Tucho, o Baluarte, situado no peirao de Palmeira, que se quedou pequeno para acoller ao máis de medio cento de persoas que se achegaron até alí para escoitar as propostas do BNG para a vindeira lexislatura.

Conscientes de que, como en toda acción de goberno hai luces e sombras, valoraron a experiencia como moi positiva facendo fincapé nos logros acadados que serven de aval para as futuras políticas que o BNG aplicará dende o goberno, e demostran que o programa electoral que o BNG presenta é un contrato coa cidadanía e, polo tanto, de obrigado cumprimento.

Durante as súas intervencións deron conta das políticas transformadoras levadas a cabo polo BNG nas cinco consellarías nas que gobernou dende o ano 2005 cando, por primeira vez na historia do país, o nacionalismo galego chegou ao goberno de Xunta. Pero sendo importante dar conta do traballo feito, é prioritario presentar as propostas para encarar o futuro do país nunha situación crítica como a que estamos vivindo. Nese senso, indicaron que o BNG apostará polas políticas de igualdade e benestar e apoiará a economía produtiva para crear emprego.

Dominga Brión resaltou a creación do Sistema Galego de Benestar que supuxo a posta en marcha dunha serie de servizos en todo o país. Significou, ademais, a visualización dunha problemática que existía, aínda que invisíbel a ollos do goberno do PP, e que elevou a rango de dereitos da cidadanía os servizos sociais, desterrando a concepción asistencialista predominante na etapa do goberno popular.

Brión fixo fincapé na dotación de servizos na comarca, como é o caso dos centros de día en Boiro e Outes, anunciando que están previstos en Muros e Rianxo. Tamén resaltou a importancia de impulsar outros servizos que se están implantando na Barbanza como é o caso do transporte adaptado e Xantar na casa ou das galescolas que xa funcionan nos concellos de Boiro e Rianxo. Lamentou que a cidadanía de Ribeira e da comarca non dispoña aínda do centro de alzheimer que está rematado hai máis de dous anos no Malecón de Ribeira a espera de realizar as obras de dotación dun ascensor, que o goberno municipal retrasou deliberadamente. Tamén amosou o seu pesar porque o goberno do PP rexeitara servizos como a galescola, alegando que non era necesario, ou os locais de ensaio.

A candidata do BNG aludiu á necesidade de continuar coa aposta de crear emprego construíndo os parques empresariais que están en marcha na comarca, dotándoos de naves modulares en réxime de alugueiro con opción de compra para respaldar aos novos emprendedores/as, favorecendo así a creación de novas empresas. Seguir impulsando ao sector turístico, con grandes potencialidades na Barbanza, e reforzar ao comercio de proximidade, como xa ten feito co financiamento do novo mercado de Palmeira dende a Consellería de Industria, son claros exemplos de apoio aos nosos sectores productivos.

Para rematar, incidiu na necesidade de continuar con estas políticas transformadoras, levándoas a outras áreas do goberno como é o caso da pesca, da sanidade ou da educación, das que expuxo as máis importantes propostas programáticas. Concluíu chamando á participación para consolidar os cambios iniciados.

O PP retrasa deliberadamente a apertura do centro de alzheimer de Ribeira

Feb 20th, 2009

by Domi.

No comments yet

Ribeira conta dende hai máis de dous anos con un centro de alzheimer practicamente rematado, para 40 prazas. Tan só falta dotalo dun ascensor. Ía a ser o primeiro destas características que se puxera en marcha no país. Está situado no entrechán da R/ do Malecón núm. 24, (onde estaba antigamente o centro de saúde). Este local foi cedido por un período de 5 anos renovables pola entidade Caixa Galicia.

A dotación de accesibilidade, de entrada, parecía unha solución relativamente fácil. Sen embargo, converteuse nunha verdadeira carreira de obstáculos até hoxe. Durante todo este tempo, e pese ao empeño de Vicepresidencia para poñer este centro ao servizo de toda a cidadanía que o necesita, o goberno do PP de Ribeira estivo torpedeando a apertura do mesmo, ben por acción ou por omisión.

Dotación dun ascensor

Despois de analizar diversas posibilidades, a solución adoptada por Vicepresidencia para facer accesíbel o local, foi a colocación dun ascensor nun oco ao lado da porta lateral no que aínda a día de hoxe hai un transformador de Fenosa. Isto implicaba o traslado do mesmo a outro lugar e supoñía desviar unhas canalizacións de augas. Facíase, polo tanto, necesaria unha colaboración a catro bandas: Vicepresidencia, Concello de Ribeira, Fenosa e Caixa Galicia.

Pero a colaboración que inicialmente ofreceu o goberno do PP resultou ser, na práctica, un canto de serea. O compromiso brillou pola súa ausencia. Non fixo unha soa xestión para que o centro de alzheimer abrira as súas portas, máis ben todo o contrario. Pese a que se comprometeu a axilizar os trámites para a concesión dos permiso e licenzas necesarios, tan só o fixo de cara á galería. Na práctica, non lle importou que este fora un servizo socialmente moi demandado. Tan só puxo atrancos unha e outra vez.

Retraso na concesión da licenza e outros atrancos

Para calquera goberno responsábel, esta actuación tiña que ter prioridade máxima e, polo tanto, a concesión da licenza debería ser inmediata. Pero o Goberno do PP demostrou que non lle importan nin as persoas enfermas nin as súas familias. Doutro xeito, o goberno local debería ser o primeiro interesado en que a cidadanía do noso Concello dispuxera dun servizo tan importante como é este.

O importe da obra de traslado do transformador na vía pública foi valorada polo Concello en 18.663,04 euros, que se comprometeu a pagar Vicepresidencia. Pero aínda así o goberno do PP esixiulle a Fenosa unha fianza polo importe da obra, que esta se negou a abonar. Isto supuxo un novo retraso, sendo precisa a mediación de Vicepresidencia para solucionar este conflito e que o goberno lle “perdoara” a fianza.

Para rematar, chama a atención que despois de contar con todos os permisos en decembro de 2008 as obras, que as realiza Aquagest, non se iniciaran até o 16 de febreiro, cinco meses despois do compromiso de pago de Vicepresidencia.

Máis información:
2009-02-19-centro-de-alzheirmer-de-ribeira.pdf

Mitin do BNG na Lonxa de Ribeira

Feb 19th, 2009

by Domi.

No comments yet

Autonómicas 2009: calendario de actos do BNG de Ribeira

Feb 12th, 2009

by Domi.

No comments yet

Xoves: 12-feb, 23:30, Pegada de carteis

Venres: 13-feb, 20:00, Olveira, Bar O Rueiro
Merchi Blanco
Xosé Luís Groveiro
Ana Álvarez
Dominga Brión

Sábado: 14-feb, 10:30, MERCADILLO, reparto de propaganda

Sábado: 14-feb, 19:00, Carreira, Casa da Cultura
Nacho González
Ánxeles González
Antonio V. Cobas
Dominga Brión

Domingo: 15-feb, 12:30, Corrubedo, Bar Pequeño
Ana Álvarez
Xosé Luís Groveiro
Dominga Brión

Domingo: 15-feb, 18:00, Oleiros Bar Ayaso
Xosé Luís Groveiro
Quico Ayaso
Dominga Brión

Luns:16-feb, 17:00, Ribeira, Liceo Marítimo, acto informativo Polígono Barbanza
Dominga Brión
Daniel Pino

Luns: 16-feb, 20:00, Touro, Bar Lola
Antón Parada
Ana Álvarez
Dominga Brión

Martes: 17-feb, Reparto de propaganda electoral

Mércores: 18-feb, 18:00, Ameixida, Porto
Luís Teira
Ana Álvarez
Antón Parada
Dominga Brión

Mércores: 18-feb, 20:00, Castiñeiras, Bar O Timón
Luís Teira
Ana Álvarez
Plácido Betanzos
Dominga Brión

Xoves: 19-feb, 20:00, Palmeira, Bar Tucho
Plácido Betanzos
Luís Teira
Dominga Brión
Rubén Cela

Venres: 20-feb, 19:00, Aguiño, Bar Tamba
Ánxeles González Sabarís
Ánxeles González Cruxeiras
Carmen Lampón
Dominga Brión
Carlos Aymerich

Sábado: 21-feb, 10:30, MERCADILLO, reparto de propaganda

Sábado: 21-feb, 20:00, Artes, Centro Recreativo
Nel Vidal
Ana Álvarez
Xosé Luís Groveiro
Dominga Brión

Domingo: 22-feb, 17:30, Ribeira, Lonxa, Mitin Central
Luís Teira
Dominga Brión
Ana Pontón
Anxo Quíntana

Luns: 23-feb, 16:00, Debate Tele Salnés

Martes: 24-feb, reparto propaganda

Mércores: 25/feb, Mitin provincial en A CORUÑA

Xoves: 26-feb, 20:30, Ribeira, Liceo Marítimo
Ana Álvarez
Xosé Luís Groveiro
Dominga Brión
Xoán Carlos Báscuas

Venres: 27-feb, Mitin nacional de peche de campaña, VIGO

O BNG presenta unha solución á afectación de Costas

Feb 12th, 2009

by Domi.

No comments yet

O BNG explicou aos veciños e veciñas de Palmeira o significado da disposición adicional segunda da Lei de Vivenda de Galiza que se aprobou recentemente por unanimidade no Parlamento Galego

A exposición foi seguida con gran interese polas persoas asistentes

Dominga Brión e Carmen da Silva, candidatas do BNG ao Parlamento Galego pola Coruña e Pontevedra respectivamente, expuxéronlle a preto de medio cento de persoas que se achegaron á Casa do Mar de Palmeira, a importancia que a aprobación da Lei de Vivenda de Galiza ten para dar unha solución definitiva ás vivendas afectada pola aplicación da Lei de Costas en todo o país, entre as que se atopan as de moitos veciños e veciñas de Palmeira Norte e Areeiros en Ribeira.

Esta Lei foi publicada no DOG o día 20 de xaneiro e entrará en vigor aos tres meses da súa publicación. Na súa disposición adicional segunda, equipara a urbanos, a efectos da aplicación da Lei de Costas de 1988, os núcleos ruais afectados.

Máis información…

Disposición adicional 2ª de Lei de Vivenda de Galiza:
2009-01-20-lei-de-vivenda-de-galiza-d-a-segunda.pdf

Nova no Canal Rías Baixas:
Carme da Silva expón a nova lei de vivenda en Palmeira

Reunión informativa: Lei de Vivenda de Galiza

Feb 10th, 2009

by Domi.

No comments yet

Unha solución á afectación de Costas

O vindeiro 11 de febreiro, ás 20,30 horas, celebrarase na Casa do Mar de Palmeira unha reunión informativa en relación coa Lei de Vivenda de Galiza, aprobada recentemente por unanimidade no Parlamento Galego.

A Lei abre unha nova porta para dar unha solución definitiva á cidadanía afectada pola aplicación da Lei de Costas en todo o país entre os que están os veciños e veciñas de Palmeira Norte, en Ribeira.

Nesta reunión participarán Carme Dasilva, deputada do BNG e candida ao Parlamento Galego e Dominga Brión, voceira municipal do BNG de Ribeira e candidata ao Parlamento Galego.

Máis información…

O Valedor do Pobo interésase polo transporte escolar de Artes

Feb 8th, 2009

by Domi.

No comments yet

O Valedor do Pobo admite a trámite a queixa relativa ao transporte escolar dos pais e nais do alumnado do IES Coroso de Artes

Diante da absoluta falla de respecto da Consellería de Educación por non dar cumprimento ás súas propias promesas, tanto por escrito como no Parlamento Galego, de solucionar o problema de transporte do alumnado desta parroquia que asiste ao IES Coroso, os Pais e Nais de Artes decidiron, no mes de xaneiro pasado, remitir as súas queixas ao Valedor do Pobo.

Ademais do escrito de queixa o Valedor recibiu un amplo historial con todos os datos e iniciativas diante da Consellería de Educación e a promesa de solución do seu representante no Parlamento Galego. Na súa resposta, o Valedor admite a trámite a queixa e anuncia investigación sumaria diante da Consellería de Educación.

Os pais e nais de Artes queren insistir en que seguirán reclamando o que xa teñen recoñecido como dereito que os asiste e lamentan que, mentres non se dea cumprimento ao prometido, moitos nenos e nenas escolares de Artes sigan padecendo unha situación inxusta e discriminatoria.

O medio rural co BNG

Feb 7th, 2009

by Domi.

No comments yet

BNG de Ribeira no acto nacional do Medio Rural

A candidata da Barbanza, Dominga Brión, acompañada dunha ampla representación do BNG de Ribeira e de representantes de varias comunidades de montes da localidade asistiron ao acto nacional do Medio Rural. Tamén acudiron representantes do BNG de toda a Barbanza así como labregos e labregas e gandeiros e gandeiras de toda a bisbarra.

No multitudinario acto, o candidato do BNG á presidencia da Xunta, Anxo Quintana, afirmou, diante de máis de 1.600 persoas procedentes de todo o país, que “o BNG é a forza política propia do país, a única que defende o medio rural, para iso ten o seu estilo propio, para gobernar con valentía e sen ataduras”.

No recinto feiral de Amio, en Santiago de Compostela, o líder nacionalista defendeu, diante das máis de 1.600 persoas procedentes de toda Galiza que alí se congregaron, unha “banca pública galega que “acompañe ás explotacións e pense máis nos intereses dos gandeiros e labregos que nos dos créditos”.

Máis información…