Decembro, 2009:

A circular 5/2009, da Dirección Xeral de Educación, Formación Profesional e Innovación Educativa, dependente da Consellaría de Educación da Xunta de Galiza, dita instrucións sobre o procedemento de admisión e matrícula e organización académica nas escolas oficiais de idiomas (EOI) para o curso 2009–2010, e supón un claro retroceso para o ensino público dos idiomas. Non se contou coas aportacións dos claustros nin da Mesa Sectorial de Educación para elaborar esta circular que significa na práctica unha perda de calidade educativa, xa que, implica a redución drástica de profesorado e a ampliación de carga lectiva dos profesionais. Deste xeito ponse en perigo a diversificación curricular e a calidade das ensinanzas especializadas de idiomas.

A rede de escolas oficiais de idiomas de Galiza está formada por 11 centros e 18 seccións delegadas, sendo o noso concello un dos beneficiarios. Dicir tamén que o cadro de profesorado é de aproximadamente 450 profesionais e o alumnado chega aos 31.000.

Tanto a traxectoria nas ensinanzas dos idiomas como a importancia das escolas de idiomas en Galiza é indiscutíbel. As EOI acababan de experimentar a substitución do antigo sistema de estudos polos novos currículos adaptados aos marcos europeos sobre as linguas. Este cambio implica a reorientación na ensinanza-aprendizaxe de idiomas e posta en marcha dun enfoque comunicativo, o deseño dunha nova planificación académica, un sistema novo de elaboración de probas de certificación unificadas en toda Galiza e a diversificación da oferta educativa. Ademais impártense os cursos ordinarios e á parte ofrécense cursos monográficos, CELGA, linguaxe administrativa, cursos de formación do profesorado ou cursos monográficos de inglés audiovisual, entre outros.

Por todas estas razóns solicitamos que se inste ao Presidente da Xunta de Galiza, á Consellaría de Educación e á Dirección Xeral de Ensino, Formación Profesional e Innovación Educativa, a que retire a circular 5/2009, por implicar un retroceso significativo na calidade do ensino dos idiomas, empeorar as condicións de traballo do profesorado e reducir as posibilidades de aprendizaxe do alumnado que traballa

A Praza do Centenario de Ribeira é un punto de encontro de numerosas persoas particularmente nenos e nenas xa que nela atópase un parque infantil. Tamén é unha zona de paso tanto para viandantes e veciños e veciñas do lugar de Abesadas. Na praza tamén se atopa unha parada de autobuses non só de liña urbana senón tamén dos autobuses escolares.

Dende fai tempo está praza está totalmente a escuras xa que non se encende o alumeado do que dispón dita praza. Esta situación prexudica tanto ao alumnado dos centros educativos que pola mañá cedo esperan os autobuses como pola tarde aos nenos e nenas que non poden facer uso deste parque infantil porque a partir das seis ou sete da tarde está totalmente a escuras.

Asemade en dita praza non se colocou ningún tipo de alumeado navideño.

O Grupo Municipal do BNG de Ribeira abandona o Pleno en protesta pola forma en que o Goberno do PP tramitou a Relación de Postos de Traballo e por considerar que, aprobada deste xeito, traerá consecuencias negativas para os cidadáns e cidadás de Ribeira

O BNG ten denunciado en moitas ocasións as múltiples irregularidades do PP de Ribeira á hora de seleccionar o persoal ó servizo do Concello. Mesmo no informe da Intervención Municipal, se denuncia a “existencia dunha situación anómala que deriva dunha elección inadecuada das figuras empregadas” e tamén “a de interinos para a cobertura de prazas vacantes”. Non é de estrañar que, logo de 20 anos de réxime PPopular, os apelidos de moitos empregados municipais coincidan cos de membros do grupo de goberno.

Coa aprobación da Relación de Postos de Traballo (RPT) e Plan de Emprego, o PP pretende dar carta de natureza a esa política clientelar que vén practicando e que, se ben beneficia a algúns, prexudica a moitos e moitas traballadores e a toda a cidadanía de Ribeira.

Este organigrama de postos de traballo e o plan de emprego so vai garantir o descontento da maioría do persoal ó servizo do Concello e, moi probablemente, maiores dificultades para mellorar o funcionamento dos servizos municipais. Unha vez máis, a voceira do BNG, Dominga Brión, demostrou, na súa intervención no Pleno Municipal Extraordinario, as mentiras e falsidades do Grupo de Goberno, a saber:

- Non foi un documento “consensuado”: a proposta de RPT chega a nós 24 horas antes do primeiro Pleno. O mesmo acontece coas posteriores “modificacións”.

- Non é “aceptado pola gran maioría dos traballadores”: así o demostran as case 70 alegacións presentadas.

- O Documento final non respecta o documento asinado polos traballadores (que chega modificado ó Pleno) como mesmo denuncia por escrito un dos sindicatos asinantes (UGT).

- Contén agravios gravísimos: algúns “postos” de traballo ven aumentada escandalosamente a remuneración logo de ser asinado polos representantes laborais.

- Este documento non garante nin a xustiza retributiva nin a Pax laboral como deixa ver o anuncio de recurso ao Contencioso anunciado xa por moitos dos traballadores e traballadoras.

Dominga Brión presentou como aval dos seus argumentos todos os escritos e documentos aos que aludiu polo que demandou do Sr. Alcalde e do seu Grupo “deixar o documento pendente de aprobación para mellorar, con máis participación e transparencia, o documento actual e presentar outro que realmente dea solución ás necesidades da cidadanía do Concello de Ribeira e ós seus traballadores e traballadoras”.

Diante da negativa do Grupo do PP e do Alcalde a recoller esta nosa demanda, empeñados en reiterar os seus erros, os concelleiros e concelleiras do BNG decidimos non avalar nin sequera coa nosa presenza, a aprobación polo “rodillo” do PP dunha proposta que traerá consecuencias negativas para os cidadáns e cidadás de Ribeira.

Aminatou Haidar, loitadora polos dereitos humanos e a autodeterminación do seu pobo, o Sahara Occidental, segue retida e en folga de fame no aeroporto canario de Lanzarote debido á negativa do goberno de Marrocos, que ocupa ilegalmente o seu país desde 1975, a permitir o seu regreso ao seu domicilio d’El Aaiun, negativa que conta coa colaboración cúmplice do goberno español malia infrinxir o Dereito Internacional que estabelece que ningunha persoa poderá ser privada arbitrariamente do dereito a entrar no seu proprio país. Non é a primeira vez que Aminatou Haidar, que xa estivera até 2006 detida no infame cárcere d’El Aaiun, sofre a represión do réxime marroquino.

A dignidade de Aminatou Haidar lémbranos a todos e todas a urxencia de procurar unha solución democrática á situación do pobo saharaui, solución que pasa polo exercicio do dereito de autodeterminación tal e como ten recoñecido a comunidade internacional, e a responsabilidade histórica do Estado español como antiga potencia colonial que, en 1975, abandonou o pobo saharaui e permitíu a ocupación do seu territorio. Lémbranos tamén que o Estado español debe exixir firmemente do Reino de Marrocos o respecto aos dereitos humanos e da legalidade internacional e, en particular, o fin da ocupación do Sáhara Ocidental e da represión sobre os seus habitantes.

O BNG presentou unha iniciativa municipal para instar á Xunta de Galiza a que demande do Goberno do Estado unha actuación eficaz para lograr o regreso de Aminatou Haidar ao Sáhara Occidental, exixindo de Marrocos o respecto dos dereitos humanos e da legalidade internacional e, en particular, o fin da ocupación do Sáhara Occidental e da represión sobre os seus habitantes así como a recoñecer oficialmente a República Árabe Saharaui e Democrática e ao Frente Polisario como únicos e lexítimos representantes do pobo saharaui.