Novembro 11th, 2009:

O campo de céspede artificial d’A Fieiteira está sendo usado por varios clubs do noso concello tanto para adestrar nas súas categorías base como para competicións oficiais sobre todo en categorías base.

Unha das modalidade que practican os clubs é a de Fútbol Sete especialidade acaída para a rapazada máis pequena. Esta forma de practicar deporte esixe unhas condicións específicas: adaptacións de porterías, cuestión esta sobre a que o BNG xa ten presentado outras iniciativas, e delimitación do terreo de xogo coas marcas específicas no céspede.

A día de hoxe as liñas de pintura que deben delimitar o terreo de xogo non están pintadas, cuestión básica esta para poder practicar este deporte. Asemade temos constancia que dende o pasado 27 de setembro os clubs solicitaron aos técnicos municipais de deportes a necesidade de que se acometera esta mellora menor. Cuestión esta aínda non se acometeu.

A Federación Galega de Fútbol apercibiu aos clubs que no caso de que no próximo partido desta competición non estean feitas as marcas de pintura sancionará cunha multa ao club local.

Dende o BNG cremos que unha demanda deste tipo e de tan fácil arranxo non debería ter que esperarse tanto tempo para solucionala. O concello debe pór todos os seus medios para que as instalacións municipais estean dispoñibles para os usuarios/as que as utilicen sen que teñan sobre eles o risco de ser sancionados cunha multa económica.

O BNG de Ribeira solicítalle ao Goberno do PP de Ribeira que tome as medidas oportunas para dotar de contedores suficientes de lixo orgánico, envases e papel na rúa Cubeliños. Tamén lle reclama que se aumente a frecuencia do paso dos camións do lixo para que fagan unha recollida diaria

Na rúa Cubeliños (estrada que vai de Abesadas cara Frións), están situadas varias vivendas unifamiliares e estase construíndo un edificio que pronto vai albergar numerosos pisos. Asemade nese pequeno tramo de estrada está situada a Gardería Municipal así como un colexio de educación infantil, primaria e secundaria.

Son numerosas as queixas da veciñanza e usarios/as das instalacións educativas xa que non contan con suficiente número de contedores para a recollida selectiva do lixo.

As queixas tamén se producen polo insuficiente paso dos camións do lixo que deben recoller eses refugallos. Por alí o camión non pasa todos os días e faino cada 4 ou 5 días quedando o lixo varios días nunha rúa que é moi transitada por escolares e familias que van aos centros de ensino.