Setembro, 2009:

A Lei 9/2001 destaca a necesidade de promover e contribuír a unha mellor conservación dos humidais galegos atendendo á súa especial fraxilidade e valor dende o punto de vista medioambiental. Os instrumentos específicos de ordenación medioambiental configúranse como: Plans de Ordenación dos Recursos Naturais; obrigatorios e executivos, Plans Rectores de Uso e Xestión e Normas de protección.

Estes instrumentos primeiro avaliarían o grado de conservación e a partires de aí establecen regulacións xerais e específicas con respecto aos usos e as actividades que nestes espazos se poidan levar a cabo.

Asemade esta mesma lei establece que a declaración dun Parque esixirá previa elaboración e aprobación do correspondente Plan de Ordenación dos Recursos Naturais; aínda que excepcionalmente poderán declararse sen a previa elaboración do Plan cando existan razóns que o xustifiquen e que se farán constar na norma que se declare. Neste caso deberase tramitar no prazo dun ano a partires da súa declaración.

Pero aínda máis; nesa propia lei tamén se fala dunha protección preventiva que a propia Consellaría competente poderá ditar; pero estas medidas cautelares terán unha vixencia máxima de tres anos; polo tanto preguntámonos: que pasa neste Parque de Corrubedo? Logo de 17 anos da súa declaración aínda non conta con ningunha norma ou instrumento para a súa xestión e conservación. Estamos ante un vacío legal sen precedentes! Pois si, trátase diso mesmo: “eu fago, ti non”, “ese pode, aquel non…”

Ningún dos principios inspiradores da lei se cumpren no caso deste Parque Natural:

- O fomento da participación pública a través da colaboración dos sectores implicados.

- A prevención e planificación para impedir o deterioro ambiental.

- A internalización dos custos medioambientais (“quen contamina paga”).

- Desenvolvemento sostible, favorecendo os usos e aproveitamentos respectuosos co medio, tratando de que os beneficios xerados polo usos dos recursos en favor dos axentes implicados.

Agardamos que o respaldo acadado sexa o paso definitivo para que se cumpran estes principios no Parque Natural.

Iniciamos o curso político coa sesión plenaria do Concello de Ribeira do vindeiro luns, día 28 de setembro, na que se debateran un importante número de iniciativas presentadas polo BNG: 6 mocións e numerosas solicitudes. Cabe indicar que, por unha cuestión organizativa, está limitado o número de mocións a presentar por cada grupo municipal. En concreto ao BNG correspóndenos un máximo de 6. Lembramos que os plenos son públicos e poden asistir todas aquelas persoas que o desexen.

Preme enriba da iniciativa para obter máis información sobre a mesma.

No Pleno do vindeiro luns debaterase unha moción pola que dende o BNG lle solicitamos á Corporación Municipal que inste á Xunta de Galiza a garantir a gratuidade dos libros de texto e do material curricular no vindeiro curso académico

As nais e os pais do alumnado levan décadas loitando por unha mesma causa: que os libros de texto escolares sexan gratuítos para as familias con fillos e fillas matriculados en colexios públicos e concertados. Se como di a Constitución española no seu artigo 27.4 o “ensino básico é obrigatorio e gratuíto”, os manuais de texto que o alumnado necesita para seguir o curso tamén deberían selo. Tal e como está configurado o sistema educativo, o libro é aínda un elemento imprescindíbel que as familias están obrigadas a adquirir cada comezo de curso. En realidade, ao esixir este esforzo económico non se cumpre co precepto constitucional, nin se garante a igualdade de oportunidades de todos e todas á educación.

Por Orde de 6 de xuño de 2003 (Diario Oficial de Galiza do 12 de xuño), convocouse o programa de gratuidade de libros de texto nos centros de ensino sostidos con fondos públicos para os niveis obrigatorios e gratuítos, e estabelecéronse as súas normas de organización e funcionamento como un servizo fundamental á sociedade por parte dos poderes públicos, como servizo de préstamos que favorece a igualdade de oportunidades entre o alumnado e inculca valores de solidariedade, conservación do material para a súa reutilización por outras persoas e coidado do ben colectivo.

No curso 2009-2010 dase un paso atrás, cunha obsesión da actual Consellaría de Educación de desmantelar os logros conseguidos en etapas anteriores argumentando que non adoptara aínda medidas concretas sobre o programa impulsado polo goberno anterior con presenza do BNG.

Rexeitamos que unha das primeiras medidas que pon en marcha o goberno do PP sexa a de apoiar os recortes sociais. Desde o BNG, queremos lembrar, que a día de hoxe hai en Galiza 82.000 familias agardando que a Consellaría de Educación defina a súa política en materia educativa, porque aínda non saben que vai pasar cos libros de texto no vindeiro curso académico e qué vai pasar co programa de gratuidade dos libros de texto.

Consideramos inaceptábel a supresión da gratuidade universal dos libros de texto, anunciada polo conselleiro de Educación, Jesús Vázquez, na sesión do Consello Escolar de Galiza do 18 de xuño, admitidas tamén polo presidente da Xunta de Galiza. Esta proposta de recorte, xunto con outras que a Consellaría de Educación está levando adiante nestes primeiros meses do seu mandato, supón unha medida regresiva que atenta ao carácter público e gratuíto do ensino, e evidencia unha vez máis a política neglixente que este goberno está a levar a cabo.

Esta medida non pode ser a resposta do Goberno aos problemas económicos na actual situación, tal e como argumentou o conselleiro. De feito, nun contexto económico precario, o Goberno debe manter a gratuidade dos libros de texto para favorecer a economía das familias, e non usar a crise como pretexto para artellar discrecionalmente calquera tipo de política, mesmo aquelas que supoñen un ataque frontal ás garantías fundamentais polas que o Goberno debe velar. Esta política supón un paso atrás no plano educativo e social.

A tres meses da toma de posesión non sabe qué política educativa vai empregar, finalizando o curso cun total desconcerto e desconfianza por parte das familias.

É curiosa a maneira de entender a responsabilidade deste novo goberno que, por unha banda, realiza unha absurda enquisa ás nais e aos pais sobre a língua na que queren os contidos dos libros de texto e, pola outra, toma despoticamente a decisión de eliminar a gratuidade dos mesmos.

Finalmente, debemos recordar que o sistema creado polo anterior goberno da Xunta de Galiza introducía a solidariedade de compartir os libros, e que existen 82.000 familias agardando unha decisión.

No Pleno do vindeiro luns debaterase unha iniciativa pola que dende o BNG, lle solicitamos ao Goberno do PP de Ribeira que se dirixa ao Goberno Galego para que, unha vez emitida Sentencia pola Sala do Contencioso do Tribunal Supremo, que ratifica a ditada previamente polo Tribunal Superior de Xustiza de Galiza, pola que declara ilegais os depósitos de hidrocarburos do porto do Ferrazo, poña en marcha as actuacións necesarias conducentes, no ámbito das súas competencias, ao traslado destes depósitos

A Sala do Contencioso do Tribunal Supremo ven de emitir sentencia firme pola que declara ilegais os depósitos de hidrocarburos do porto do Ferrazo (Vilagarcía de Arousa) por teren sido tramitados sen a preceptiva declaración de impacto ambiental, anulando deste xeito as resolucións da Consellaría de Industria do Goberno do PP (ano 2000, sendo Manuel Fraga Presidente da Xunta) que autorizaban a instalación destes depósitos.

A maiores, esta sentencia ao tempo que ratifica a ditada previamente polo Tribunal Superior de Xustiza de Galiza, indica que a presenza destes depósitos na súa ubicación actual podería provocar contaminación das augas da ría de Arousa e da atmosfera, así como a degradación da riqueza mariña.

Esta decisión xudicial dálle a razón a un amplo movemento social, nucleado en torno á Plataforma para a Defensa da Ría de Arousa (conformada por confrarías, agrupacións mexilloeiras e outras entidades da ría), que manifestaron o seu rexeitamento desde o primeiro momento á instalación destes depósitos.

Efectivamente, xa no período 1997-98, instalábase no porto de Vilagarcía de Arousa (no peirao do Ferrazo) uns depósitos de hidrocarburos que xeran un tránsito de mercadorías perigosas no interior da ría de Arousa (lembremos: a máis rica e produtiva do noso país) que resulta absolutamente inaceptable. Conta Galiza con demasiados episodios de contaminación mariña, mareas negras, ou sinistros marítimos de todo tipo, para localizar agora no corazón da ría máis produtiva de toda Europa unha instalación altamente perigosa que representa unha ameaza para milleiros de postos de traballo. Neste contexto, é evidente que a ubicación destes depósitos no seu emprazamento actual na ría de Arousa representa un risco inasumíbel.

A ría de Arousa é un complexo natural inmensamente produtivo que permitiu o desenvolvemento dunha actividade económica moi importante nos complexos mar-industria e turístico, que se traduce en 26.000 postos de traballos directos que supoñen máis da metade de todo o emprego da beiramar da ría. A defensa desta riqueza debe ser prioridade.

O noso concello conta co complexo deportivo d’A Fieiteira onde a cidadanía practica actividades deportivas nas piscinas, campos de fútbol, pavillón, ximnasio, etc.

Ademais das persoas a título individual son numerosos os clubes que desenvolven as súas actividades nestas instalacións. E tanto uns como outros manifestan o seu descontento coas instalacións. Así pois o BNG xa ten presentado numerosas iniciativas sobre estas, ás que o goberno municipal fixo oídos xordos.

Estas instalacións, en xeral, non teñen o mantemento e melloras precisas para que as nosas e os nosos deportistas desenvolvan a actividade física nuns espazos que a nosa cidadanía merece.

Así pois preséntanse carencias, facilmente visibles, nas seguintes instalacións:

Piscina: hai menos de seis meses que o concello de Ribeira recepcionou o novo vaso da piscina. A día de hoxe este vaso da piscina atópase vacío de auga e pódense observar os desperfectos que esta nova instalación presenta: o enlousado do fondo e do lateral do vaso estase desprendendo constantemente o que provoca situacións de risco para os usuarios e usuarias da mesma. Situación esta que non se pode tolerar dado o pouco tempo que ten esta piscina. Asemade todo o recinto da piscina conta cunha serie de desperfectos (mal estado da sauna, portas deterioradas, mal estado da pintura exterior e interior, etc).

Pavillón: a cuberta debería ser revisada xa que presenta deficiencias e goteiras, igualmente o ximnasio precisa mantemento nas máquinas que alí hai.

Campo de fútbol de herba artificial: son moitas as carencias desta nova instalación. A deixadez para colocar as redes que eviten que se escapen os balóns. A grada deste campo está mal feita xa que non ten sitio para que os/as espectadores/as se poidan sentar e ademais os propios banquiños impiden a adecuada visión do xogo. Este campo está sendo utilizado por 4 clubes coas súas categorías base e debería mellorarse o horario para facer un axeitado reparto deste espazo. O muro perimetral non está ben feito e caen os bloques de cemento (xa lle caeu un na cabeza a un rapaz). As porterías de fútbol sete deberían ser de aluminio que permita que os rapaces e rapazas poidan movelas. O concello tamén debería poñer a disposición dos clubes que utilizan esta instalación un espazo para que poidan ter unha pequena oficina e espazo para xuntanzas. O entorno do campo debería coidarse xa que os días de choiva prodúcense pozas e lama que fan intransitable a zona. Indicar tamén que hai numerosas silvas dentro do recinto.

Na vista en 3D, feita por un dos veciños afectados, pode comprobarse as ilegalidades que se denuncian.

O 27 de setembro de 2004, cos votos a favor do PP, o Pleno do Concello acordou a adxudicación do concurso convocado para a xestión do servizo público da Escola Infantil Municipal a dúas adxudicataria, as Sras. García Escurís, que a levan xestionando dende aquela.

A Empresa que quedou en segundo lugar presentou un recurso contencioso-administrativo (número 175/2005) contra o Concello de Ribeira no Xulgado Contencioso-administrativo número un de Santiago de Compostela. A razón pola que as adxudicatarias deste concurso non podían presentarse ao mesmo é porque o fixeron como dúas personas físicas non unidas xuridicamente.

O fallo deste Xulgado, emitido en decembro do 2006 e notificado ao Concello en xaneiro do 2007, foi “resolver o concurso a favor do recorrente (a empresa que quedou en segundo lugar) e declarar nula a adxudicación realizada no Pleno”.

O Concello interpuxo recurso de apelación nº 4183/2007 ante o Tribunal Superior de Xustiza de Galiza, que o 26 de febreiro do 2009 emitiu sentenza fallando en contra do Concello de Ribeira, desestimando o recurso de apelación. A resolución emitida é definitiva por non caber contra ela ningún outro recurso.

Temos que denunciar, unha vez máis, o escurantismo e o déficit democrático do Goberno do PP de Ribeira, pois o Grupo Municipal do BNG enterouse de forma extraoficial desta información xa que nin o Goberno, nin o Alcalde informou aos grupos da oposición, polo menos non ao BNG, nin do recurso presentado polo Concello de Ribeira, nin da sentenza emitida polo TSXG.

Por outra banda, o BNG considera moi positivo que, por fín, o Alcalde rectifique e considere que é necesaria unha nova escola infantil, xa que o Concello de Ribeira ten un censo de aproximadamente 1.000 nenos e nenas de 0 a 3 anos.

Mágoa que non se decatara desta necesidade en outubro do 2007 cando a Vicepresidencia da Xunta de Galiza, por medio da Secretaria Xeral de Igualdade, a nacionalista Came Adan, nos confirmou que Ribeira podería contar con unha galescola, sempre que o Concello puxera a disposición o terreo.

Sen embargo, daquela, no Pleno de novembro do 2007, o Goberno do PP votou en contra da iniciativa do BNG na que solicitábamos que se puxera a disposición o devandito terreo, por considerar que nese momento non era necesaria a galescola, pese a que o censo decía todo o contrario.

Lamentabelmente, esta falta de previsión ou, máis ben, de hipocrisía política, ocasiona estas listas de espera, antes silenciadas polo PP, e, polo tanto, que moitos pais e nais non dispoñan de prazas infantís públicas, cando nestes intres podíamos contar con unha nova escola infantil en Ribeira.

A Asociación veciñal “Campo da Agra” de Corrubedo, ven de presentar reiteradas denuncias reclamando tanto a paralización das obras como a revisión da licencia municipal nº 212/2008, pola que a Xunta de Goberno Local autorizou a construción dun edificio de 17 vivendas con alturas de edificación de soto, planta baixa, 1 planta e baixo cuberta.

Esta construción pretende situarse na zona denominada Campo da Agra de Corrubedo. Compre sinalar que a meirande parte do solo onde se pretende construír esta urbanización está cualificado no Plan Xeral de Ordenación Municipal (PXOM) de Ribeira como 1.1 “Norma de Protección de Espazos Naturais”: esta ordenanza “comprende aqueles terreos que polo seu valor ambiental, ecolóxico, biolóxico, botánico, paisaxístico, científico, educativo ou recreativo deben preservarse para a súa protección e mellora.” Ademais, nesta categoría de chan rústico a Lei do Solo prohibe expresamente os usos residenciais e industriais e non se computa a efectos de edificabilidade.

A outra parte do chan ten a calificación de urbano, regulado pola Ordenanza 6.2, con un uso característico pormenorizado de vivenda colectiva. A parcela mínima é de 200 m2, a ocupación máxima é do 50% e unha edificabilidade máxima de 1,25 m2/m2.

Consideramos moi importante delimitar sobre o terreo o cualificado como chan rústico do urbano, xa que ademais de ser este o único no que se pode edificar, calquera modificación na alineación, cambia a parcela neta e, polo tanto, todos os índices que estable a Ordenanza: edificabilidade, ocupación… Por esta razón non se entende que no informe técnico se indique que se cumplen todos estes parámetros, cando no mesmo se pon de manifesto que se analizan as condicións do Proxecto “sen perxuizo de que o Plan Xeral non aclara a alineación límite entre el Solo Urbano (e a ordenanza) e o Solo Rústico que pode representar unha diferenza considerable …”.

En todo caso, as dubidas de interpretación do planeamento urbanístico producidas por imprecisións ou por contradicións entre documentos de igual rango normativo resolveranse, según se recolle no art. 6º da Lei 9/2002, “tendo en conta os criterios de menor edificabilidade, de maior dotación para espazos públicos e de maior protección ambiental e aplicando o principio xeral de interpretación integrada das normas.” Lamentábelmente, criterios moi pouco tidos en conta tradicionalmente neste Concello, no que o Goberno do PP primou sempre criterios de maior edificabilidade en detrimento da dotación de espazos públicos e da protección ambiental: rúas de nova contrución estreitas, falla de zonas verdes, precario saneamento e deterioro do noso patrimonio medioambiental e paisaxistico son só algúnhas das consecuencias que esta práctica política trouxo consigo.

Por último, hai outro antecedente que debería manexarse á hora de revisar esta licenza. Trátase da resolución da Xunta de 18 de setembro de 2008, que a través do Director da Axencia de Protección da Legalidade Urbanística, declarou ilegais parte das obras dun solar lindeiro, ao considerar que a liña límite da ordenanza é a que debe usarse para delimitar o planeamento aplicable aos terreos e non a liña de delimitación de núcleo. Conceder edificabilidade até a liña de delimitación de núcleo, según se indica na resolución, “levaría ao absurdo de considerar a “existencia dunha franxa de terreo, ... que clasificado como chan urbano, non estaría sometido a ningunha ordenación”. Non ter en conta, polo tanto, o mesmo criterio nesta parcela suporía, ademais dun absurdo, un grave incumprimento da legalidade vixente, un agravio comparativo e un serio dano a terceiros, que verian mermado o valor do seu patrimonio de persistir a contrución desta urbanización tal como se recolle na licencia nº 212/2008.