Abril, 2008:

Unha representación do BNG formada pola deputada Ana Pontón, o deputado Iago Tabarés e a Voceira municipal de Ribeira, Dominga Brión, reuniuse con unha representación dos avogados e avogadas da quenda de oficio do Partido Xudicial de Ribeira, encabezada por Fernanda Álvarez, delegada colexial do partido xudicial de Ribeira.

Na devandita reunión, as/os letrados/as manifestaron o malestar dos/as 27 profesionais que compoñen o servizo de xustiza gratuíta de Ribeira ante o que consideran un incumprimento por parte da Consellaría de Xustiza do compromiso adquirido o pasado verán. Nel, a Dirección Xeral de Xustiza recoñeceu que deben ser as Comisións de Asistencia Xurídica Gratuíta, e non os/as letrados/as, as encargadas de investigar a situación patrimonial das persoas asistidas para satisfacer os honorarios aos avogados.

Entre as garantías cada vez máis estendidas dentro dos diferentes procedementos xudiciais e mesmo administrativos, fica as declaracións en presenza ou con asistencia letrada, coa previsión de a quen careza de recursos ou non designe a un da súa confianza, asignaráselle pola quenda de oficio. Aos/ás letrados/as que presten este servizo (máis por compromiso social que por eventual beneficio económico) será a Xunta de Galiza que se faga cargo do aboamento dos seus honorarios no casos de que a persoa asistida careza de recursos, na contía previamente establecida. Máis para que iso aconteza compre que o beneficiario da asistencia xurídica pola quenda de oficio solicite e se lle conceda o beneficio da xustiza gratuíta. Na práctica, fundamentalmente no ido penal as persoas asistidas esquécense mesmo de solicitar o beneficio de xustiza gratuíta, decote máis preocupados por outros problemas que o aboamento dos honorarios do letrado e procurador que lles asiste, asesora e defende e representa. Por esta razón, en moitos casos, a letrada e procuradora deixan de percibir os emolumentos devengados pola súa actuación profisional.

Dende fai uns meses, a Consellaría denega sistematicamente o beneficio de xustiza gratuíta por pasividade do asistido, é dicir, porque a persoa defendida de oficio non achega a documentación necesaria para acreditar que, efectivamente, non dispón de medios para pagar a minuta a un letrado/a. A Dirección Xeral de Xustiza comprometeuse a que esta verificación patrimonial se realizaría de oficio pola Administración, pero na actualidade isto non se cumpre, o que supón perdas económicas aos letrados «e que non se recoñeza o noso traballo», indican.

Iago Tabarés, deputado do BNG, mostrou onte o seu apoio en Ribeira ao colectivo e anunciou que presentará unha iniciativa parlamentaria para que a Xunta responda ao por que deste cambio de actitude. Para o nacionalista, esta situación non pode prolongarse no tempo porque «é un grave problema que pon en perigo un dereito fundamental de todas as persoas con poucos recursos que non recoñece a labor imprescindible dous avogados».

Tabarés recalcou o seu compromiso cos avogados da quenda de oficio e ofreceuse a mediar ante a Dirección Xeral de Xustiza para «solucionar unha situación que ten fácil arranxo».