Marzo, 2008:

Santiago, 18 de marzo de 2008.- A Consellaría de Innovación e Industria valora positivamente a medida do Ministerio de Industria, Turismo y Comercio de establecer mediante decreto a exención dos devengos de calquera dereito de acometida así como das contías derivadas dos cambios e actuacións nos equipos de control e medida que requiran as modificacións de potencia contratada dos consumidores acollidos á tarifa 2.0 con discriminación horaria nocturna, a chamada tarifa nocturna. A medida recóllese, en concreto, no Real Decreto 222/2008, de 15 de febreiro, polo que se establece o réxime retributivo da actividade de distribución de enerxía eléctrica, publicado hoxe no BOE, e responde ás demandas da Consellaría de Innovación e Industria perante o Ministerio de efectuar un reparto de cargas que inclúa ás compañías distribuidoras co fin de minorar os custes derivados do cambio de tarifa.

A exención destes dereitos, non obstante, a xuízo da Consellaría de Innovación non será suficiente para paliar o efecto negativo do cambio tarifario nas economías domésticas dunhas 180.000 familias usuarias da chamada “tarifa nocturna” en Galiza. O departamento dirixido por Fernando Blanco reclamou perante o Estado o mantemento da tarifa 2.0 con discriminación nocturna para os usuarios actuais da mesma, nos termos nos que se estivo aplicando até este momento e/ou no marco das tarifas de último recurso (aqueles prezos máximos fixados polo Estado que poderán cobrar os comercializadores que asuman o subministro en baixa tensión, en determinados casos, despois da desaparición das tarifas eléctricas).

Innovación e Industria denunciou particularmente no Ministerio de Industria o feito de que o custe do cambio recaese sobre o usuario e demandou unha valoración dos efectos reais da modificación e un reparto das cargas que incluíra ás compañías distribuidoras e mesmo á propia administración estatal.

O vicepresidente destacou o cambio de perspectiva emprendido dende o Goberno galego a través dunha “estratexia país” que aposta por unha xestión integral, racional, sostible e rendible do monte

Reivindicou a cuberta forestal galega como a primeira infraestrutura do país

A “potencia forestal galega” prové máis da metade da madeira producida no Estado, 7,4 millóns de metros cúbicos que superan a achega de todas as demais comunidades autónomas xuntas

O peso do sector no PIB galego é do 3,5%, por riba do que supón no de potencias forestais como Finlandia (3,7%) e Nova Zelanda (3,1%)

En 2007 a industria forestal galega rexistrou un crecemento do 6% na súa facturación, cunha cifra de negocio de 2.419 millóns

Santiago, 26 de marzo de 2008.- A Rede Galega de Centros de Día de Alzheimer e outras demencias estará composta entre 2008 e 2009 por 12 centros, unha rede que supón un dos eixos estratéxicos do Sistema Galego de Benestar, que está implementando a Vicepresidencia. Así o explicou hoxe no Parlamento o vicepresidente da Xunta, Anxo Quintana, quen salientou o carácter diferencial, especializado e de excelencia desta Rede, que coloca a Galiza na vangarda dos servizos de atención á dependencia.

O vicepresidente explicou que a Rede responde a dúas premisas básicas: a mellora da calidade de vida das persoas que padecen Alzheimer ou outras enfermidades neodexenerativas e dos seus familiares e a mellora das estratexias para previr e para diminuír os efectos destas enfermidades. Quintana resaltou que esta Rede se está consolidando en dúas vías paralelas: mediante a aprobación do marco normativo necesario para regular esta nova tipoloxía de centros e mediante o impulso dun proceso de concertación de esforzos e cooperación entre a Xunta, as asociacións de familiares, os concellos e as entidades de iniciativa social.

O resultado final desta combinación de esforzos será a Rede Galega de Centros de Día de Alzheimer e outras demencias, que estará composta por 12 centros e que, en conxunto, sumará máis de 400 prazas de atención especializada. Os centros sitúanse en Santiago, Lugo, Ourense, Pontevedra, Ferrol, Vigo (2 centros), O Porriño, Moaña, Ribeira, Ribadeo e Celeiro (Viveiro).