Xaneiro, 2008:

O pasado martes, día 20 de febreiro ás 4 da madrugada, produciuse un grave accidente no que un mozo faleceu por electrocución, según se recolle no informe da autopsia. Isto aconteceu ao lado dunha carpa provisional, instalada por unha empresa contratada polo Concello de Ribeira, na rúa Portugal, diante do auditorio e a carón dunhas farolas do alumeado público.

Estes feitos agravanse máis, se cabe, porque existen indicios solventes de que a instalación do alumeado público xa dera sinais de mal funcionamento, pois existen denuncias previas de descargas eléctricas presentadas diante da Policía Local xa dende decembro pasado.

É notoria a alarma existente entre a cidadanía dada a incerteza que este grave suceso xerou. Polo tanto, resulta realmente preocupante que, pasado xa un tempo prudencial, non se deran explicacións por parte do Grupo de Goberno e, nomeadamente, do Alcalde nen a cidadanía, nen a Corporación Municipal, nen tan sequera aos seus voceiros, a respeito das causas deste dramático acontecemento, das posibles neglixencias que o ocasionaron e das actuacións que del deberan derivarse.

O BNG de Ribeira demanda máis transparencia en relación cos acordos adoptados nas diferentes Xuntas de Goberno Local (formada integramente por concelleiros e concelleiras do PP). Neste senso, solicitamos que se proceda con urxencia á elaboración das actas atrasadas das sesións celebradas dende marzo ata a data e á súa entrega aos concelleiros e concelleiras da Corporación Municipal.

Tamén reclamamos que se faga entrega de todas as actas municipais (tanto das Xuntas de Goberno como do Pleno Municipal) en soporte informático.

O Sistema Democrático tense dotado, ademais das institucións e órganos pertinentes para a elaboración das leis e o exercicio de goberno, das normas polas que estas deben regulamentarse para cumprilas e facelas cumprir. Tamén está prevista, en aras do exercicio transparente do goberno, a posibilidade de control por parte de quen, no seu momento, teña a responsabilidade de exercer, por mandato do pobo ao que representa, labores de oposición ao executivo correspondente.

Entre os órganos de goberno do Concello de Ribeira destaca polo seu mal funcionamento a Comisión de Goberno que ten entre as súas obrigas a de facer públicos os acordos que se adopten nas súas reunións, tal como se recolle no artigo 50.3 do Regulamento Orgánico Municipal (ROM) para, ademais de deixar constancia aos efectos oportunos, poder ser consultadas polos grupos de oposición no exercicio das súas funcións de control e fiscalización aos órganos de goberno.

A inexistencia de actas desde fai meses, ademais de apuntalar o escurantismo nos acordos tomados por este órgano, impide o exercicio de dereitos fundamentais por parte non só dos grupos da oposición, senón tamén da cidadanía en xeral, ocasionando incluso disfuncións noutros departamentos municipais. Conduce a unha política de feitos consumados que deixa á cidadanía en absoluta indefensión.

Por outra banda, tamén consideramos moi importante que determinados servizos, como é a entrega de actas aos membros da corporación, se faga de xeito informático. Ademais das inxentes cantidades de papel que se aforrarían, tamén a entrega das mesmas se faría dun xeito máis áxil, mesmo por correo electrónico, coa correspondente optimización de recursos humanos. O persoal que hoxe, entre outras cousas, se encarga do reparto das actas aos concelleiros e concelleiras, podería facer outras labores moi necesarias para un mellor servizo a toda a cidadanía do Concello.