Artes pídelle aos Reis Magos o transporte escolar

Nais e pais do alumnado de Artes, nun novo intento por chamar a atención da Consellería de Educación sobre o seu problema, acudiron aos Reis Magos para que lle concedan as súas peticións ó longo do presente curso.

Aproveitaron a presenza do paxe real no auditorio de Ribeira para facerlle entrega dunha carta na que lle piden aos Reis Magos a ampliación da ruta do autobus que actualmente leva ós seus fillos e fillas ata o instituto de Ribeira onde cursan estudos. Con este acto simbólico pretenden reclamar novamente a atención da Consellería de Educación sobre un problema que levan denunciando anos.

Este mesmo venres, a deputada do BNG, Ana Pontón, formulou unha pregunta parlamentaria sobre o estado das negociacións para dotar ao alumnado de Artes dun transporte en condicións. Polo momento, semella que os rapaces e rapazas terán que armarse de paciencia e afrontar a volta ás aulas, novamente, sen autobus escolar.