Setembro, 2007:

Por este cruce circulan a diario un elevado número de vehículos (camións cara a Couso, tráfico a Aguiño, a Carreira, ó Vilar…). O tráfico neste lugar sofre un forte incremento na tempada estival co movemento da poboación cara os lugares e praias da zona.

O elevado número de accidentes rexistrados neste punto nos últimos anos obriga a tomar medidas na procura da súa diminución e para evitar máis contratempos.

Este cruce está dotado actualmente dunha deficiente sinalización horizontal e vertical que leva á confusión, nomeadamente en horas nocturnas, a moitos dos usuarios da vía.

Hai tamén instaladas unhas ineficaces “bandas sonoras” que, ademais de causar molestias para todos os conductores e conductoras, non solucionan o problema de seguridade no antedito cruce.

O veciños e veciñas das parroquias afectadas levan anos demandando un sistema de regulación do tráfico que lles cause menos prexuízos e incremente a seguridade na zona, tanto a vehículos como a persoas.

Razóns todas elas máis que suficientes para que o Goberno Municipal leve a cabo as actuacións necesarias co obxecto de que se mellore a seguridade viaria no “Cruce do Vilar”.

O lugar da Graña, da parroquia de Carreira, conta cun número moi importante de veciños/as, preto de 200; inserto no Parque Natural do Complexo Dunar de Corrubedo e lagoas de Carregal e Vixán, logo de máis de 20 anos de goberno do PP e máis de 10 anos de declaración do Parque, aínda non se deu solución ó problema da carencia de saneamento. Todo o lugar a estas alturas verte directamente ó Parque Natural.

Os/as veciños/as pasaron polo concello en infinidade de ocasións demandando este servicio; eles/as ademais de prexudicados/as pola Declaración de Parque considéranse abandonado/as por parte deste Goberno Municipal.

Dende o Grupo municipal do BNG consideramos o saneamento integral do concello algo prioritario e non ten para nós cabida que lugares, como a Graña, que verten directamente á zona medioambiental máis protexida coa que conta a Península da Barbanza, por non dicir a provincia da Coruña, se atopen aínda sen sanear.

O pasado venres, día 3 de agosto, con motivo das Festas de Ribeira instalouse na Praza da Concordia o Parque de inchables “Riveiralancia” a partir das 12:00 horas. O que en principio parecía que ía a ser unha xornada agradable para os nosos nenos e nenas converteuse en “accidendata” para varios deles/as.

Xa a primeira hora resultaron lesionados varios/as rapaces/as con rabuñaduras en distintas partes do corpo a causa de que, polo menos, un dos inchables non estaba en perfectas condicións. Desinflouse durante un rato, pero ao pouco tempo volvérono a poñer en funcionamento, alegando que xa estaba arranxado. Pouco despois produciuse o accidente máis grave da xornada resultando lesionada en ámbolos dous brazos unha nena que xogaba no mesmo inchable, ao caer de varios metros de altura. Ao parecer, a causa de todos estes accidentes é o deteriorado estado dalgún dos elementos do devandito xogo.

Consideramos que un goberno responsábel debería facer un control máis exhaustivo das instalación provisionais dirixidas ao público en xeral e máis, se cabe, nas dirixidas ao infantil e xuvenil en particular que se colocan non noso Concello.

O BNG de Ribeira, por medio do concelleiro Xosé Luís Groveiro, ven de solicitar a limpeza de varios camiños da parroquia da Artes.

Trátase de dous camiños que saen da pista que une a Igrexa co Castro e que van dar ao lugar de Teixoeira. Estes dous camiños dan servizo a numerosas fincas de labor ás non se pode acceder por atoparse absolutamente intransitables ao estar cubertas pola broza.

O feito que a actividade agrícola teña diminuído nos últimos tempos non xustifica o abandono da responsabilidade do Concello no mantemento destes que son camiños públicos e que, ademais de facilitar a comunicación na parroquia e o acceso ás propiedades do vecindario, contribúen, de estar limpos, a unha mellor defensa contra o lume.

A pesares de que se demandou reiteradamente (hai máis dun ano) por parte de propietarios de fincas ás que se accede por estes camiños a limpeza dos mesmos, ate o momento o Goberno do PP non accedeu ás súas xustas demandas.