Setembro, 2007:

Onte, día 29 de setembro, unha ampla representación do BNG de Ribeira, encabezada polo seu Grupo Municipal, achegámonos ata o Frontón de Riazor, na Coruña, para participar no acto de conmemoración do 25 aniversario do BNG, que se fundou en 1982, coa intención de ser a casa común do nacionalismo galego. A completa unificación das forzas políticas nacionalistas produciuse en 1994.

Anxo Quintana, Xosé Manuel Beiras, Francisco Rodríguez, Encarna Otero e Henrique Tello interviron no acto, que foi presentado por Iria Aboi. Unha multitude nacionalista fixo que este emblemático lugar se quedara pequeno.

As actuacións de Miro Casabella, un dos máis relevantes cantautores de Voces Ceibes, que interpretou O meu país, Rodrigo Romaní, Anxo Pintos e Lizgairo, o Mago Antón e Pepe Vaamonde co seu grupo, puxeron a nota lúdica.

O día 28 de setembro acudín, acompañada de Xosé Luís Groveiro e Luís Teira, á entrega dos Dolmen de Ouro, que este ano chega a súa XIX edición. Con este galardón a Federación de Empresarios da Barbanza distingue ao empresariado máis sobresaínte das comarcas da Barbanza, Sar, Muros e Noia.

A velada celebrouse nun marco incomparábel, o Pazo do Tambre, en Outes, e para nós transcorreu en agradable compañía, compartindo mesa e mantel, entre outras persoas, co vicepresidente da CECB, Jaime López Sánchez, a súa dona, Esperanza e o xerente de Ferrallas Calo, agasallado con un Dolmen de Ouro.

A Federación de Empresarios do Barbanza outorgou dezaseis distincións a outras tantas empresas do seu ámbito de actuación. Ademais dos premiados en cada municipio, en Ribeira foi Bodegas A Parra, recoñeceu á academia de perrucaría Yara, polo uso da lingua galega; a Estivada Ecuestre, pola iniciativa empresarial; a Dermofarmacia Deolinda, por toda unha vida de dedicación; a Ferralla Calo’s, e a Salustiano Piñeiro. Piñeiro, emigrante retornado, que recibiu a quinta medalla de ouro da FEB, expresou coas súas palabras o sentir dos distinguidos: «O futuro desta terra será tan brillante como nós podamos imaxinalo, sempre que se afronte con traballo, honestidade e ilusión».

A esta cita anual asistiu unha ampla representación do BNG encabezada pola Directora Xeral de Promoción Industrial e Sociedade da Información, Helena Veiguela, e o vicepresidente da Deputación, Pablo Villamar, que destacaron a importancia da coordinación entre entidades públicas e privadas para mellorar as condicións de vida e traballo, resaltando o labor da empresa privada no desenvolvemento socioeconómico de Galiza.

Tamén asistiron o delegado da Consellería de Innovación e Industria, Lois Barcia, o delegado da Consellería de Vivenda e Solo, Xoán Carlos Bascuas, a deputada provincial da comarca, Rosana Pérez, e o tamén deputado provincial, Xoán Cabo. Alcaldes do BNG, como Xosé Deira de Boiro, Voceiros e Voceiras municipais, Concelleiros e Concelleiras nacionalistas de toda a comarca tampouco quixeron faltar a esta celebración.