Xuño, 2007:

Que Ribeira e a Barbanza teñen moitas potencialidades sen desenvolver en materia de turismo, non é ningunha novidade para o Conselleiro de Innovación e Industria, o nacionalista Fernando Blanco. Hoxe, coincidindo co comezo da tempada alta o Conselleiro achegouse ata Ribeira para poñer en valor todo ese potencial turístico co que contamos.

O turismo é unha actividade transversal que engloba diferentes sectores e profesións, en constante adaptación a unha realidade social cambiante e suxeita a unha forte competencia. Por iso unha lei que pretenda regular o turismo en Galicia debe ter en conta non só o propio potencial económico do mesmo na nosa Comunidade Autónoma, senón tamén os condicionantes que veñen de fóra, tanto pola competencia internacional como pola propia regulación da Unión Europea.

Uns simples datos poden dar unha idea cabal da súa importancia na economía galega. Cunha produción superior aos cinco mil millóns de euros o turismo representa preto do 12% do PIB galego, participación que aumenta no que se refire ao emprego, pois máis do 13% dos traballadores galegos traballan nos diversos sectores produtivos englobados baixo a denominación xenérica de turismo. Estes valores son moi similares aos que presenta o sector turístico noutros ámbitos territoriais máis amplos como poden ser España ou a Unión Europea, non sendo os problemas tampouco moi diferentes, consecuencia da progresiva globalización do sector.

De aí que os principais obxectivos desta nova lei coincidan plenamente cos establecidos na Comunicación da Comisión Europea de 17 de marzo de 2006, na que se recoñece, acorde coa renovada Estratexia de Lisboa do ano 2005, o potencial do turismo para xerar emprego e crecemento económico, o seu papel na preservación do patrimonio cultural e natural, así como a súa contribución ao diálogo intercultural e ao fortalecemento da propia identidade, aspectos todos eles tratados nesta lei. Conseguir eses obxectivos esixirá de toda a sociedade galega a plena conciencia de que o futuro do sector pasa por alcanzar un modelo de turismo sustentable, que, de acordo co aprobado polo Parlamento Europeo no ano 2005, comprende cando menos a garantía da súa viabilidade económica, un emprego de calidade, a implicación das comunidades locais, preservar a riqueza cultural e a diversidade biolóxica e asegurar a eficiencia no uso dos recursos, valores todos eles defendidos na nova lei.

Como non vai a ser todo traballo, a noite de San Xoan tocou ir de troula. Foron moitas as cacharelas que alumearon a noite máis pequena do ano en toda Ribeira. Pero antes as sardiñas asadas con boroa (pan de millo) e o churrasco fixeron as delicias d@s asistentes á maioría delas.

Así foi, polo menos, na primeira festa de San Xoan organizada pola Asociación Veciñal de Abesadas e Cubeliños, á que asistimos convidad@s pola directiva. Calquera se resiste a un convite así! Por certo, estaba todo moi ben organizado e as sardiñas boísimas.

A CONSELLERÍA DE VIVENDA E SOLO ABRE O PRAZO DE SOLICITUDE PARA AS AXUDAS DO PROGRAMA REMATE EXTERIOR DAS VIVENDA NO MEDIO RURAL ATA O 31 DE AGOSTO

􀂃 A Consellería dedica unha partida de 1,5 millóns de euros en 2007 a este programa, 500.000 € máis que en 2006.

􀂃 A contía das axudas pode acadar os 6.000 €, o que supón un incremento do 50% respecto ao ano pasado.

􀂃 Estas axudas van dirixidas a persoas ou familias cunha renda que non supere os 1.200 € mensuais.

A CONSELLERÍA DE VIVENDA E SOLO ABRE O PRAZO DE PRESENTACIÓN DE OFERTAS PARA A REDACCIÓN DOS PROXECTOS SECTORIAL E DE URBANIZACIÓN DO PARQUE EMPRESARIAL DO BARBANZA POR 705.694 €

 O Diario Oficial de Galicia (DOG) publica hoxe, 20 de xuño, o prego de bases, o prazo de presentación de ofertas remata o 6 de agosto

 Este parque contará cunha superficie de 1 millón de metros cadrados, nos concellos de Ribeira e Pobra do Caramiñal, e o investimento total previsto é de 32 M. €

A Consellería de Vivenda e Solo, que dirixe a nacionalista Teresa Táboas, abre o prazo de presentación de ofertas do concurso público para a redacción do Proxecto Sectorial e de Urbanización do Parque Empresarial do Barbanza, cunha superficie de 1 millón de metros cadrados, situado entre os Concellos de Ribeira e Pobra do Caramiñal. O Diario Oficial de Galicia (DOG) publica hoxe o prego de bases do concurso. O prazo de presentación de ofertas e remata ás 14:00 horas do 6 de agosto. As propostas deberán presentarse nun rexistro oficial da Xunta ou poden ser enviadas por correo dentro do prazo establecido.

Ademais da redacción dos proxectos Sectorial e de Urbanización, o concurso público inclúe a redacción do Estudo de Impacto Ambiental, Prospección e Informe Arqueolóxico, Estudo de Seguridade e Saúde e o Plan de Calidade. A data límite de entrega de todos estes documentos é o 15 de decembro de 2007.

Da superficie total do parque, 541.520 metros cadrados estarán dedicados a uso empresarial e industrial, 311.824 serán espazos libres, 124.198 metros cadrados estarán ocupados pola rede viaria e 31.386 metros cadrados serán os destinados a equipamentos. O investimento total previsto nesta actuación é de 32.062.224 euros, dos que mais de 27 millóns se dedicarán á urbanización e 4,1 millóns se empregarán na adquisición de terreos.

A Consellería de Vivenda e Solo prevé que os traballos previos de planeamento así como a súa tramitación administrativa se desenvolvan ao longo deste ano 2007 e que as obras de urbanización poidan comezar no primeiro semestre de 2008.

O Parque Empresarial do Barbanza está situado nos municipios de Ribeira e Pobra do Caramiñal, que comparten unha economía relacionada co sector pesqueiro e cunha actividade industrial concentrada na conserva. A localización desta infraestrutura é produto dun estudio de viabilidade medioambiental, técnica e económica no que se analizaron 6.000.000 metros cadrados de terreo antes de optar pola área de actuación concreta que albergará o futuro parque.

Este parque incluirá naves modulares para os pequenos empresarios que queiran instalarse co obxectivo de dar resposta ás súas necesidades de solo produtivo a un prezo e nunhas condicións razoables. Estas naves terán un tamaño aproximado de 500 metros cadrados e serán adxudicadas en réxime de aluguer con opción de compra transcorridos 10 anos.

Ademais, o futuro Parque Empresarial do Barbanza contará cun edificio de usos múltiples para dar servizo aos empresarios que se instalen neste parque, tanto de Ribeira como de Pobra do Caramiñal. Este edificio, que contará con espazos comúns de novas tecnoloxías, estará situado nunha parcela de uso dotacional público e será adxudicado por concesión administrativa durante un prazo determinado de tempo.

O Parque Empresarial do Barbanza está incluído no Proxecto Galiza Suma, que supón a construción de parques empresariais estratéxicos e ben dimensionados, cunha alta calidade arquitectónica e tecnolóxica, con dotacións e servizos propios do século XXI.

O sábado, 16 de maio, tomaron posesión 29 alcaldesas e alcaldes nacionalistas e todo apunta a que após os contenciosos se sumarán as alcaldías de Castrelo de Miño e Manzaneda. Produceuse pois, un incremento considerable ao pasar de 17 a 29 alcaldias. Tamén é significativo o aumento de concelleiras e concelleiros, pasando de 595 a 661. Concretamente na Barbanza contamos con 6 representantes máis nos nosos concellos, dous deles en Ribeira, pasando de 15 a 21 concelleiras e concelleiros. Contamos, ademais, coa alcaldía de Boiro.

O compromiso do BNG coa igualdade, que xa se reflectiu na elaboración de listas paritarias, fai que por primeira vez teñamos alcaldesas nacionalistas: Clara Millán (Cangas), Sandra González (Tomiño), Socorro Cea (Melide), Manuela García Freire (Vilasantar) e Teresa Barge Bello (A Bola).

Foron escollidos alcaldesas e alcaldes nacionalistas nos concellos de Boiro, Arzúa, Vilasantar, Monforte, Allariz, Rairiz de Veiga, Vilar de Santos, A Bola, Bueu, Sada, Carballo, Zas, Mugardos, San Sadurniño, Melide, Teo, Tomiño, Salceda de Caselas, Cangas, Moaña, Poio, Pontevedra, Gondomar, O Porriño, Maceda, Mondoñedo, Ribadeo, Riotorto e Pobra de Brollón. Como xa se indicou, e pendentes de recursos, tamén serán previsiblemente para o BNG as Alcaldías de Castrelo de Miño e Manzaneda.

Os meus parabéns a todos os nosos alcaldes e dun xeito moi especial as nosas cinco primeiras alcaldesas, o igual que ás nosas concelleiras e concelleiros.

Hoxe tomou posesión a séptica Corporación Municipal de Ribeira da democracia. A cidadanía decidiu que alí estiveran 6 concelleiros e concelleiras formando o Grupo Municipal do BNG. Reiteramos a nosa gratitude e o noso compromiso coa cidadanía de Ribeira.